سیاست میں گالی گلوچ نہیں اچھے کاموں کا مقابلہ ہونا چاہئے: طلال چودھری

09 ستمبر 2017

اسلام آباد (این این آئی) وزیر مملکت برائے داخلہ طلال چوہدری نے کہا ہے کہ سیاست میں گالم گلوچ نہیں بلکہ اچھے کاموں کا مقابلہ ہونا چاہئے، صوبوں کے درمیان ہسپتالوں، تعلیمی اداروں اور انفراسٹرکچر کی بہتری کے مقابلہ سے پاکستان ترقی کرے گا، بچوں کو زیور تعلیم سے آراستہ کرنے کے ساتھ ساتھ تربیت دینے اور آداب سکھانے کی بھی ضرورت ہے۔ جمعہ کو اسلام آباد کالج فار گرلز ایف سکس ٹو میں ڈیجیٹل دنیا میں خواندگی کے موضوع پر تقریری مقابلے کے انعقاد کی تقریب سے مہمان خصوصی کی حیثیت سے خطاب کرتے ہوئے انہوں نے کہا کہ اسلام نے ہمیں تعلیم حاصل کرنے کی ترغیب دی ہے خواہ اس کیلئے کتنی ہی مشکلات کیوں نہ اٹھانا پڑیں۔ انہوں نے کہا کہ تعلیم حاصل کئے بغیر ہم اسلامی تعلیمات سے آگاہی حاصل کر سکتے ہیں نہ اچھے برے کی تمیز سیکھ سکتے ہیں۔ وزیر مملکت برائے داخلہ نے بہترین کارکردگی کا مظاہرہ کرنے والی طالبات میں انعامات اور شیلڈز تقسیم کیں۔ طالبات کی بڑی تعداد نے تقریب کے بعد وزیر مملکت برائے داخلہ سے آٹو گراف لئے اور سیلفیاں بنوائیں۔