عراق نے کرد جنگجوئوں کیخلاف کارروائی نہ کی تو ہم خود کرینگے: ترک صدر
انقرہ (اے پی پی) ترک صدر رجب طیب اردگان نے کہا ہے کہ عراق نے اگر شمالی عراق کی قندیل، سنجر اور مخمور پہاڑیوں پر واقع کرد جنگجوؤں کے کیمپوں کے خلاف کارروائی نہیں کی تو ترکی ان پر حملہ کرے گا۔ عالمی ذرائع ابلاغ کے مطابق طیب اردگان نے ٹی وی چینل سی این این ترک کے ساتھ انٹرویو میں یہ بات کہی۔انہوں نے کہا کہ ترکی کسی بھی دن کسی بھی وقت شمالی عراق کے قندیل پہاڑی پر حملہ کر سکتا ہے۔ ترکی شمالی عراق میں قندیل کی پہاڑیوں پر ٹھکانہ بنانے والی غیر قانونی کردستان ورکرز پارٹی ( پی کے کے ) پر سرحد پار سے کارروائی کرتا رہتا ہے۔ ترکی نے شمالی عراق کے سنجر علاقے میں بھی فوجی کارروائی شروع کرنے کی دھمکی دی ہے۔