لاس اینجلس کے جنگلات کی آگ بے قابو،ہلاکتوں کی تعداد 5،درجنوں زخمی

امریکی ریاست کیلیفورنیا کے لاس اینجلس کے مضافاتی علاقے میں موجود جنگلات میں لگنے والی آگ سے ہلاک افراد کی تعداد 5 ہوگئی جبکہ متعدد زخمی ہو گئے  ، آگ سے نقصانات کا تخمینہ 50 ارب ڈالر سے بھی زائد ہوگیا۔غیر ملکی  خبررساں ادارے کے مطابق امریکی ریاست کیلی فورنیا کے شہر لاس اینجلس کے مضافاتی علاقے پیسفک پلیسیڈز میں لگنے والی آگ مسلسل پھیلتی جارہی ، 10 ایکڑ پر لگنے والی آگ تیز ہوائوں کے باعث اب کئی ہزار ایکڑ تک پھیل چکی ، آگ سے اب تک 5 افراد ہلاک اور درجنوں زخمی ہوگئے جبکہ ایک ہزار سے زائد گھر اور کاروباری مراکز راکھ کا ڈھیر بن گئے  ۔  آگ کے شعلوں نے التادینا علاقے کی مسجد التقویٰ کوبھی لپیٹ میں لے لیا جبکہ ہالی وڈ کی مشہور شخصیات کے اربوں روپے مالیت کے گھر بھی تباہ ہوگئے۔ آگ اس قدر ہے کہ اسے بجھانے کیلئے اہلکار اور پانی کم پڑگیا جبکہ لاکھوں افراد متاثرہ علاقہ خالی کرنے پر مجبورہوگئے،آگ لگنے کی وجوہات سامنے نہ لائی جاسکیں۔آگ بھڑکنے کی وجہ سے لاس اینجلس شہر کی فضا خطرناک حدتک آلودہ ہوگئی ،آگ سے ہزاروں گھر اور کاروباری مراکز جل کر خاک ہوگئے، آگ سے نقصانات کا تخمینہ 50 ارب ڈالر سے بھی زائد ہو چکا ہے۔ ادھر آگ کے باعث علاقہ مکینوں کے گھر چھوڑنے پر لٹیروں کی چاندی ہوگئی، خالی گھروں میں لوٹ مارکے واقعات بھی رپورٹ ہورہے ہیں۔