آئی سی سی اجلاس میں شرکت کیلئے نجم سیٹھی دبئی پہنچ گئے
لاہور(اے این این )آئی سی سی اجلاس میں شرکت کیلئے نجم سیٹھی دبئی پہنچ گئے۔ویسٹ انڈیز نے پاکستان سپر لیگ کے فورا بعد مارچ میں3 ٹی 20 انٹر نیشنل میچ کھیلنے کے لیے رضامندی تو ظاہر کردی ہے،لیکن پاکستان کرکٹ بورڈ کو ویسٹ انڈیز کی جانب سے حتمی جواب کا انتظارہے۔پاکستان کرکٹ بورڈ کے چیئر مین نجم سیٹھی دبئی میں ویسٹ انڈین بورڈ کے صدر ڈیوڈ کیمرون سے اس بارے میں جواب حاصل کریں گے۔ اجلاس 8 اور 9 فروری کوہوگا،نجم سیٹھی نے کہا ہے کہ اجلاس کی سائیڈ لائن پرمختلف بورڈز کے سربراہان سے ملاقات کروں گاجبکہ ویسٹ انڈیز بورڈ سے دورہ پاکستان کے حوالے سے بات ہوگی۔ویسٹ انڈیز کا دورہ مارچ کے آخر میں پاکستان سپر لیگ فائنل کے بعد طے ہے جبکہ مختلف بورڈز سے بھی پاکستان میں آکر کھیلنے کے حوالے سے بات چیت ہو گی۔انہوں نے مزید کہا کہ پاکستان میں کرکٹ کی بحالی کے لیئے مثبت پیش رفت ہو رہی ہے اور جلد بریک تھرو ملے گا۔