ڈاکٹر قدیر خان کی رہائی کی خوش خبری ہمیں سب سے پہلے انکے بھتیجے نے فون کرکے بتائی‘ فرط مسرت سے ان کی آواز بھرا رہی تھی۔ انہیں اتنا خوش پہلے کبھی نہیں پایا‘ ڈاکٹر خان سے متعلق ان سے جب بھی بات ہوتی تھی وہ نہایت دل گرفتہ ہوتے تھے‘ ڈاکٹر صاحب کی نظر بندی نے انکے پورے خاندان کو پریشان کررکھا تھا‘ انکے بھائی بھتیجوں کے نام بھی ایگزٹ کنٹرول لسٹ میں شامل کردیئے گئے تھے جو نام ملک وقوم کے ساتھ ساتھ خاندان کیلئے بھی باعث فخر تھا اس سے نسبت کی انہیں سزا دی جا رہی تھی ‘وہ اپنے پیارے چچا کوزیر عتاب دیکھتے تھے‘ انکی کردار کشی ‘ پھر کینسر جیسے موذی مرض میں مبتلا ہونا‘ جب وہ کراچی آئے تو ان سے ملاقات کی اجازت نہ ملنا‘ ڈاکٹر صاحب کے بھتیجے ان تمام تکلیف وہ مراحل سے ’’نوائے وقت ‘‘ کو وقتاً فوقتاً آگاہ کرتے رہتے تھے‘ اسی تعلق سے انہوںنے جمعے کو ڈاکٹر صاحب کی رہائی کی خبر آتے ہی ہمیں فون کرتے ہوئے مبارکباد دی اور ایم ڈی نوائے وقت گروپ جناب مجید نظامی کو خراج تحسین پیش کرتے ہوئے کہا کہ ہم نظامی صاحب کے احسان مند ہیں ‘ آپ کے ادارے کی کوششوں نے ڈاکٹر صاحب کی رہائی میں کلیدی کردار ادا کیا ہے۔ نظامی صاحب نے ڈاکٹر صاحب کے حق کیلئے سب سے پہلے آواز اٹھائی اور مستقل مزاجی سے اپنی کاوشیں جاری رکھیں ‘ ہمیں یہ ہمیشہ یاد رہے گا ۔ ان کا فون بند ہوا تو ہمیں ڈاکٹر قدیر کے خاندان سے رابطوں کا آغاز یاد آگیا۔ جنرل مشرف کے دور میں جب وہ نظر بند کئے گئے تو انکے متعلق کوئی خبر باہر نہیں نکلنے دی جاتی تھی ‘ میڈیا پر حکومتی موقف ہی پیش کیا جاتاتھا ‘ جبکہ کئی بڑے میڈیا گروپ بھی ڈاکٹر قدیر خان کی کردار کشی مہم کا حصہ بنے ہوئے تھے‘ ہمیں فخر ہے ادارہ نوائے وقت کے سربراہ جناب مجید نظامی نے جابر سلطان کے سامنے کلمہ حق گوئی کی روایت برقرار رکھتے ہوئے ملک وقوم کیلئے ڈاکٹر قدیر خان کے گرانقدر کارنامے کے پیش نظر ان کی نظر بندی کے خلاف توانا آواز اٹھائی ‘ جب ان کی حالت زار سے قوم کو آگاہی کا کوئی ذریعہ نہیں تھا تو ہم نے کراچی میں ڈاکٹر قدیر کے خاندان سے رابطہ کیا‘ ان کی بہن رضیہ حسین‘ بھائیوں اور بھتیجے سے بات چیت کے ذریعے قارئین کے سامنے حقائق پیش کئے۔ جنرل مشرف کی عائد کردہ قید تنہائی اور کردار کشی کی مہم نے محسن پاکستان کو بیمار کردیا‘ انہیں کینسر نے آگھیرا ۔ ہم نے ان کی یہ تمام تکالیف قوم سے بیان کیں ‘ نوائے وقت اور نیشن مستقل اشتہار کے ذریعے محسن پاکستان کی رہائی کا مطالبہ کرتے رہے۔ ’’ وقت ‘‘ چینل نے اپنے آغاز کے فوراً بعد ڈاکٹر قدیر خان پر سلسلہ وار پروگرام شروع کیا جو اپنی نوعیت کا پہلا اور واحد پروگرام تھا ۔ نوائے وقت کی ان کوششوں کو قوم کی پذیرائی حاصل تھی۔ نہ صرف اپنے یہاں لوگوں سے یہ تاثرات ملتے تھے بلکہ اوورسیز پاکستانی بھی اپنے خیالات کا اظہار ان الفاظ میں کرتے تھے کہ نوائے وقت میں محسن پاکستان کیلئے اشتہار اور ’ ’ وقت ‘‘ چینل کا پروگرام دیکھ کر محسوس ہوتا ہے ہمارے دلی جذبات کی ترجمانی کی جارہی ہے۔

امریکہ : ایک تہائی سیاہ فام فوجیوں کو نسلی امتیاز کا سامنا ، ٹرمپ دور میں اضافہ ہوا : رپورٹ

اسی دوران خودڈاکٹر صاحب سے بھی ہمیں بات کرنے کا موقع ملا‘ وہ جہاں نظر بندی کی تکالیف کا ذکر کرتے‘ بڑے اخباروں کے جانبدار رویے کی شکایت کرتے وہیں جناب مجید نظامی کیلئے ان کے الفاظ اور لب ولہجہ اظہار تشکر سے معمو ر ہوتا‘ ڈاکٹر صاحب نے ہمیں بتایا تھا وہ اپنی یادداشتیں تحریر کررہے ہیں‘ تمام تکالیف کے باوجود ان کے لہجے کا عزم اور امید کم نہیں ہواتھا‘ انہوںنے کہا تھا یہ ڈکٹیٹر ضرور اپنے انجام کو پہنچے گا ‘ میرا ضمیر مطمئن ہے‘ مجھے یقین ہے ’’ میری بے گناہی ثابت ہوگی‘‘ ۔

کورونا علامات کے حوالے سے ایک اور حیران کن تحقیق

ڈاکٹر قدیر کی کہی ہوئی یہ باتیں کانوں میں گونجتی ہیں اور ٹی وی پر انہیں ’’ ر ہائی کے بعد‘‘ دیکھتی ہوں تو ان کا سفید سر‘ مضمحل سراپا ا ور چہرے کی مسکراہٹ مل کر دھوپ چھائوں کا سا تاثر پیدا کرتے ہیں‘ وہ شخص جس نے اپنی جوانی‘ بہترین توانائیاں ملک وقوم کی سربلندی کیلئے وقف کردیں‘ جب پاکستان دولخت ہواتو اس غم میں محض کڑھتے رہنے کی بجا ئے انہوںنے اپنے ملک وقوم کے درد میں آنسوئوں کو ’ ’ ایٹم ‘‘ کی شکل میں ڈھال دیا اور قوم کو اس کی سالمیت کے لئے ایسا تحفہ دیا جس کی اہمیت اب بچے بچے کو معلوم ہے جب امریکہ اور بھارت بلاشبہ پاکستان کو آنکھیں د کھاتے‘ ڈراتے ودھمکاتے ہیں مگر اس سے آگے بڑھنے کی انہیں ہمت نہیں ہوتی‘ پاکستان کا دفاع ناقابل تسخیر بنا دینے کے جرم میں ڈاکٹر قدیر خان کے گرد سازشوں کا جال بنا گیا‘ جو خودسب سے پہلے ایٹم بم استعمال کرکے جیتے جاگتے شہروں کو نیست ونابود کرنے والے ہیں‘ بموں کی خریدوفروخت میں ملوث رہے ہیں انہوںنے ڈاکٹر قدیر خان نیٹ ورک کا ’’ پتہ ‘‘ چلایا اور ان پر ایٹمی رازوں وسامان کی فروخت کا الزام عائد کیا‘ جبکہ امریکہ کے دبائو میں آئی ہوئی مشرف حکومت نے ان الزامات کا تمام تر بار ڈاکٹر قدیر پر تن تنہا ڈالتے ہوئے انہیں نظر بند کردیا‘ وہ پانچ برس تک قید تنہائی میں مبتلا رہے‘ اب جبکہ اسلام آباد ہائی کورٹ نے انہیں ’’ بے گناہ‘‘ قراردے دیا اور ڈاکٹر خان نظر بندی سے باہر نکلے ہیں ان کے سراپے پر اس سزا کے اثرات واضح ہیں‘ انہوںنے کہا ہے نواز شریف نے اپنی جلا وطنی ‘ آصف زرداری نے اپنی قید کے لئے کسی پر مقدمہ نہیں کیا وہ بھی نہیں کرینگے۔

پرنٹ لائن

وہ د عویٰ کریں بھی تو کس سے ‘یہ سزائیں اور یہ رہائیاں انصاف وقانون کے وجود پر خود ایک سوال ہیں۔

٭٭٭٭٭٭