اسلام آباد: وزیراعظم عمران خان نے وفاقی کابینہ کا اجلاس کل طلب کر لیا ۔جس میں ملکی سیاسی اور معاشی صورتحال پر غور کیا جائے گا۔

وزیراعظم عمران خان کی جانب سے کل طلب کیے گئے اجلاس میں وفاقی کابینہ 10 نکاتی ایجنڈا پر غور کرے گی۔آٹے اور چینی کی ناجائز قیمتیں بڑھانے سے متعلق مسابقتی کمیشن کی رپورٹ وفاقی کابینہ میں پیش کی جائے گی جبکہ وفاقی کابینہ کو بجلی اور گیس کی قیمتوں سے متعلق بریفنگ بھی دی جائے گی۔ اس کے علاوہ اسلام آباد لوکل گورنمنٹ کمیشن کی تشکیل کی منظوری بھی کابینہ ایجنڈا کا حصہ ہے جبکہ کابینہ کراچی ایئر پورٹ کی اراضی کے ڈومیسٹک اجارہ سکوک جاری کرنے کے معاملے پر غور کرے گی۔وفاقی کابینہ بلوچستان کی خصوصی ایپلیٹ عدالت برائے انسداد سمگلنگ کے جج کی تعیناتی کی منظوری دے گی جبکہ وزارت قومی صحت کے زیر تعمیر ترقیاتی منصوبوں کی تکمیل کی اجازت،او پی ایف کے بورڈ آف گورنرز کی تبدیلی کا معاملہ بھی کابینہ ایجنڈا میں شامل ہے۔ اس کے ساتھ ساتھ کابینہ ورکرز ویلفیئر فنڈ کی گورننگ باڈی کی تشکیل نو کی منظوری بھی دے گی۔