مقبوضہ کشمیر میں بھارتی دہشت گردی تھم نہ سکی، بھارتی فوج نے فائرنگ کر کے مزید دو کشمیریوں کو شہید کردیا،دوران آپریشن چار گھر دھماکے سے اڑا دیے، انٹرنیٹ اور موبائل سروس معطل کر دی ۔کشمیر میڈیا سروسز کے مطابق دونوں نوجوانوں کو سری نگر کے علاقے مجگنڈ میں شہید کیا گیا۔بھارتی فوج نے سرچ آپریشنز کی آڑ میں دونوں نوجوانوں کو شہید کیا۔قابض بھارتی فوج نے دوران آپریشن چار گھر دھماکے سے اڑا دیے۔واقعے کے بعد علاقے میں مظاہرین سڑکوں پر نکل آئے۔ انٹرنیٹ اور موبائل سروس معطل کر دی گئی ہے۔بھارتی فوج کا آپریشن اب بھی جاری ہے۔واضح رہے کہ بھارتی فوج نے اس سے قبل تین دسمبر کو ضلع شوپیاں میں سرچ آپریشن کے نام پر ایک گھر کو دھماکے سے اڑا دیا تھا اور پرامن کشمیری مظاہرین پر فائرنگ اور شیلنگ کی تھی۔نومبر 2018 میں بھارتی قابض فوج نے 48 بے گناہ کشمیریوں کو شہید کر دیا تھا۔ جن میں تین خواتین اور دو بچے شامل تھے۔بھارتی فوج نے نام نہاد سرچ آپریشنز کی آڑ میں مظلوم کشمیریوں کے 26 گھر تباہ کر دیے تھے۔