حکومت نے مظفر مرزا کو تین سال کیلئے کمشنر ایس ای سی پی تعینات کر دیا 

لاہور (کامرس رپورٹر) وفاقی حکومت نے سکیورٹیز اینڈ ایکسچینج کمشن آف پاکستان ایکٹ، 1997ء کی دفعہ 5 اور 7 کے تحت اختیارات استعمال کرتے ہوئے مظفر احمد مرزا کو کمشنر، ایس ای سی پی (سیکیورٹیز اینڈ ایکسچینج کمشن آف پاکستان) مقرر کر دیا ہے۔ یہ تقرر فوری طور پر تین سال کی مدت کے لیے مؤثر ہے۔ مظفر احمد مرزا اس سے قبل ایس ای سی پی میں چیف پروسیکیوٹر/ایگزیکٹو ڈائریکٹر کے طور پر خدمات انجام دے رہے تھے۔ جولائی 2012ء میں کمشن میں شمولیت کے بعد سے، انہوں نے قانونی ڈویژن کی قیادت کی اور کمشن کے قانونی اور انفورسمنٹ افعال میں کلیدی کردار ادا کیا۔ انہوں نے پاکستان کے کارپوریٹ اور مالیاتی ریگولیٹری فریم ورک کی تشکیل میں اہم کردار ادا کیا ہے۔ ان کی اہم خدمات میں متعدد تاریخی قانونی اصلاحات پر کام کرنا شامل ہے۔ مقدمات اور قانون سازی کے علاوہ، مظفر احمد مرزا نے کارپوریٹ شعبے کو جدید بنانے اور مضبوط کرنے کے وسیع تر اصلاحی اقدامات میں بھی فعال کردار ادا کیا ہے۔