کراچی (نوائے وقت رپورٹ) تحریک انصاف اور جماعت اسلامی نے سندھ میں مشترکہ بلدیاتی الیکشن لڑنے پر اتفاق کر لیا۔ نجی ٹی وی کے مطابق دونوں جماعتوں نے ایک انتخابی نشان پر الیکشن لڑنے پر بھی غور کیا۔ میڈیا سے گفتگو کرتے امیر جماعت اسلامی کراچی حافظ نعیم الرحمان نے کہا تحریک انصاف کے رہنمائوں سے ملاقات مثبت  رہی۔ جماعت اسلامی اور تحریک انصاف نے مل کر انتخاب لڑنے پر کمیٹیاں قائم کر دیں صوبائی صدر تحریک انصاف نادر اکمل لغاری  نے کہا کہ دھاندلی روکنے کیلئے تحریک انصاف، جماعت اسلامی الیکشن کمشن کے پاس جائیں گے کراچی سمیت سندھ میں اپنی مرضی سے یونین کونسل کو توڑا جا رہا ہے۔ حافظ نعیم نے کہا جماعت اسلامی کو جعلی فہرستیں  اور جعلی حد بندیاں  منظور نہیں، بلدیاتی انتخابات جلد ہونے چاہئیں لیکن جلد بازی میں نہیں جب کہ نجی اداروں سے بیلٹ پیپرز چھپوانے کے حق میں نہیں۔