ناصر عباس تارڑ کی وفاقی وزیر اوورسیز سے ملاقات

08 نومبر 2013

فرانس کی نامور سماجی سیاسی شخصیت ناصر عباس تارڑ نے گزشتہ روز لندن میں وفاقی وزیر اوورسیز پاکستانی پیر صدر الدین راشدی سے ملاقات کر کے انہیں اوورسیز پاکستانیوں کے مسائل سے آگاہ کرتے ہوئے کہا کہ اوورسیز مقیم پاکستانی اپنی جان سے بھی زیادہ اپنے ملک پاکستان کی قدر کرتے ہیں۔ حکومت ان کی حوصلہ افزائی کے لئے اقدامات کرے۔ ناصر تارڑ نے وفاقی وزیر کو فرانس کے دورے کی دعوت بھی دی۔اس موقع پر وفاقی وزیر نے ناصر عباس تارڑ کی دعوت قبول کرتے ہوئے یقین دلایا کہ وہ سمندر پارپاکستانیوں کے مسائل سے بخوبی آگاہ ہیں وہ چاہتے ہیں کہ سمندر پار پاکستانیوں کے مسائل ترجیحی بنیادوں پر حل ہوں جس کیلئے وہ کوشاں ہیں۔ وفاقی وزیر نے ناصر عباس تارڑ سے کہا کہ وہ یورپ میں مقیم پاکستانیوں کے مسائل سے متعلق اپنی تجاویز دیں تاکہ انہیں حل کیا جا سکے۔ 

لندن کنزرویٹو پارٹی  کی طرف سے ظہرانہ 
لندن : کنزرویٹو پارٹی لندن کے ڈائریکٹر اور سید قمر رضا کی طرف سے لارڈ چانسلر اور سیکرٹری آف سٹیٹ فار جسٹس کے اعزاز میں شاندار ظہرانہ کا اہتمام کیا گیا جس میں کنزرویٹو پارٹی کے اعلیٰ عہدیداران، وزرائ، ممبران پارلیمنٹ اور پاکستان کے وفاقی وزیر خرم دستگیر نے شرکت کی۔ تقریب میں پاکستان اور برطانیہ کے باہمی تعلقات پر زور دیا گیا اور برطانیہ میں مقیم پاکستانیوں کی خدمات کو بھی سراہا گیا۔ تقریب میں شریک افراد نے سید قمر رضا کی پاکستان و برطانیہ کے لئے کی گئی خدمات کو زبردست انداز میں خراج تحسین پیش کیا گیا۔انہوں نے کہا کہ سید قمر رضا ذاتی مفادات سے بالاتر ہو کر صحافی صرف دل سے پاکستان و پاکستانی عوام کی خدمت کر رہے ہیں اور برطانیہ و پاکستان کے درمیان پُل کا کردار ادا کر رہے ہیں۔