’’بھارت نے علاقائی امن خطرے میں ڈ الا‘‘ اسحاق ڈار کی سفیروں کو بریفنگ 

اسلام آباد (خبر نگار خصوصی) نائب وزیراعظم اور وزیر خارجہ سینیٹر محمد اسحاق ڈار نے اسلام آباد میں مقیم سفیروں کو 6 اور 7 مئی کی درمیانی رات کو پاکستان اور آزاد جموں و کشمیر میں بھارتی حملوں پر بریفنگ دی۔ دفتر خارجہ کے مطابق نائب وزیراعظم نے بھارتی جارحیت کی شدید مذمت کی جس نے نہ صرف پاکستان کی خود مختاری کی خلاف ورزی کی بلکہ علاقائی امن و استحکام کو بھی خطرے میں ڈالا۔ بھارت نے یہ اقدامات اقوام متحد کے چارٹر، بین الاقوامی قانون اور بین ریاستی تعلقات کو کنٹرول کرنے والے اصولوں کی صریح خلاف ورزی کرتے ہوئے کئے۔ انہوں نے دہشتگروں کے بنیادی ڈھانچے کو نشانہ بنانے کے بے بنیاد بھارتی دعووں کو مسترد کر دیا۔  اسحاق ڈار نے او آئی سی کے سیکرٹری جنرل حسین ابراہیم طہٰ سے ٹیلی فونک رابطہ کیا۔ ترجمان دفتر خارجہ کے مطابق او آئی سی سیکرٹری جنرل نے معصوم شہریوں کی شہادت پر اظہار تعزیت کیا۔ سیکرٹری جنرل او آئی سی نے پاکستان سے یکجہتی اور کشمیری عوام کی حمایت کا اعادہ کیا۔