26 نومبر احتجاج ، 250 ملزموں کی ضمانت بعدازگرفتاری درخواستوں پر سماعت ملتوی

اسلام آباد(نمائندہ نوائے وقت)انسداد دہشت گردی عدالت کے ڈیوٹی جج طاہر عباس سپرا کی عدالت نے ڈی چوک 26 نومبر احتجاج پر درج مقدمات میں 250 ملزمان کی ضمانت بعدازگرفتاری درخواستوں پر سماعت ملتوی کردی۔گذشتہ روز سماعت کے دوران ملزمان کے وکلا انصر کیانی،سردار مصروف،آمنہ علی،فتح اللہ برکی و دیگر پیش ہوئے،جج طاہر عباس سپرا نے ریمارکس دیے کہ ان مقدمات میں متعدد ملزمان کی ضمانتیں ہو چکی کچھ کی خارج ہوئی ہیں،اس عدالت نے بھی بیمار ملزمان اور بچوں کی ضمانتیں منظور کی ہیں،جج طاہر عباس سپرا نے وکلا کو ہدایت کی کہ ان مقدمات میں جو ضمانتیں منظور ہوئیں اس کا حکم نامہ تو ساتھ لگا دیتے،پراسیکیوٹر نے کہاکہ ملزمان کے وکلا کیجانب سے فیصلے ساتھ لگانے چاہیے تھے،مگر ہم لگا دیتے ہیں،جج طاہر عباس سپرا نے کہاکہ یہ تمام درخواستیں بدھ کیلئے رکھ لیتے ہیں بدھ کوجج صاحب آجائیں گے،پراسیکیوٹر نے کہاکہ ان درخواستوں میں جمعہ یا ہفتہ کی تاریخ دے دیں،عدالت نے کیس کی سماعت 9 جنوری تک ملتوی کردیں۔پی ٹی آئی کے 250 سے زائد کارکنان کیخلاف تھانہ کوہسار ،کراچی کمپنی، اور سیکریٹریٹ میں دو 2 مقدمات ،تھانہ مارگلہ، ترنول، رمنا میں ایک 1 مقدمہ درج ہے۔