امریکی وزیر دفاع کا آرمی چیف جنرل قمر جاوید باجوہ کو ٹیلی فون ، مشرق وسطی کی حالیہ سیکیورٹی صورتحال پر تبادلہ خیال
آرمی چیف جنرل قمر جاوید باجوہ نے کہا ہے کہ خطے میں امن کے لیے تمام کوششوں کی حمایت کریں گے۔پاک فوج کے شعبہ تعلقات عامہ (آئی ایس پی آر)کے ڈائریکٹر جنرل میجر جنرل آصف غفور کے مطابق امریکی وزیر دفاع ڈاکٹر مارک ٹی ایسپرنے آرمی چیف جنرل قمر جاوید باجوہ کو ٹیلی فون کیا اور مشرق وسطی کی حالیہ سیکیورٹی صورتحال پر تبادلہ خیال کیا گیا۔امریکی وزیردفاع نے کہا کہ ا مریکہ جنگ نہیں چاہتا اگر ناگزیر ہوا تو امریکہ بھرپور قوت سے جواب دے گا۔آرمی چیف جنرل قمر جاوید باجوہ نے کہا کہ ہم چاہتے ہیں کہ کشیدگی میں کمی ہو اور ہم خطے میں امن کے لیے تمام کوششوں کی حمایت کریں گے۔ تمام فریقین سفارتی طریقے سے معاملات حل کریں۔انہوں نے کہا کہ تمام فریقین نے مل کر دہشت گردی کے خلاف جنگ میں کردار ادا کیا ہے اور خطے میں امن کے لیے بھی ہم نے اکٹھے کردار ادا کیا ہے۔آرمی چیف نے کہا کہ افغان مفاہمتی عمل کی کامیابی کے لیے کردار ادا کرتے رہیں گے اور نئے تنازعات میں جانے کے بجائے افغان امن عمل کو پٹڑی سے نہیں اترنے دیں گے۔