شمالی وزیرستان میں سکیورٹی فورسز کا آپریشن
شمالی وزیرستان میں سکیورٹی فورسز نے آپریشن کرکے پانچ دہشت گردوں کوٹھکانے لگا دیا۔ ہلاک ہونے والے دہشت گردوں سے اسلحہ اور گولہ بارود برآمد ہوا۔ مارے جانے والے دہشت گردوں کے بارے میں بتایا گیا ہے کہ وہ سکیورٹی فورسز کے خلاف دہشت گردی کی کارروائیوں اور معصوم شہریوں کے قتل میں ملوث رہے۔ فائرنگ کے شدید تبادلے کے دوران سپاہی ناصرخان شہید ہو گیا۔ دوسری طرف افغانستان میں تعینات پاکستانی ناظم الامور پر ہونے والے دہشت گردی کے حملے کے حوالے سے افغان طالبان نے لاتعلقی کا اظہار کرتے ہوئے اس میں غیرملک کو ملوث قرار دیدیا ہے۔ افغان طالبان کے ترجمان اور امارت اسلامیہ افغانستان کے نائب وزیراطلاعات اور علم و ثقافت ذبیح اللہ مجاہد نے ٹویٹ کرتے ہوئے کہا کہ حملے میں ملوث ایک شخص کو گرفتار کیا گیا ہے جس کا تعلق داعش سے ہے۔ انہوں نے کہا کہ کابل میں امارات اسلامیہ کے خصوصی دستوں نے پاکستانی سفارتخانے پر فائرنگ کرنے والے شخص کو گرفتار کر لیا ہے اور یہ حملہ داعش اور باغیوں نے مشترکہ طورپر کیا تھا جس کا مقصد برادر ممالک کے درمیان بداعتمادی پیدا کرنا تھا۔
افغانستان کی سرزمین سے امریکہ اور اس کے اتحادی ممالک کی افواج تو نکل گئی ہیں‘ لیکن دہشت گردی کا سلسلہ بدستور جاری ہے جس کا پاکستان شکار چلا آرہا ہے۔ امارت اسلامیہ کے قیام کے فوری بعد اپنے ایک پالیسی بیان میں افغان حکومت نے یہ اعلان کیا تھا کہ افغانستان کی سرزمین پاکستان سمیت کسی بھی ملک کے خلاف استعمال کرنے کی اجازت نہیں دی جائے گی‘ لیکن اس بیان کے باوجود پاکستان میں دہشت گردی کے واقعات ظہور پذیر ہوتے رہے اور دہشت گرد افغانستان کی سرزمین سے ہی آکر پاکستان میں دہشت گردی کی کارروائیاں کرتے رہے۔ گزشتہ دنوںافغانستان میں قائم پاکستانی سفارتخانے پر دہشت گردوں نے حملہ کیا جس میں ناظم الامور عبیدالرحمان نظامانی معجزانہ طور پر بچ گئے تاہم ایک گارڈ شدید زخمی ہوگیا تھا۔اس قاتلانہ حملہ کے حوالے سے اب افغان حکومت کے ترجمان کی طرف سے یہ اعلان سامنے آیا ہے کہ اس میں غیرملکی ہاتھ ہے۔ اگر اس میں کسی افغان باشندہ کا تعلق نہیں تھا تو بھی افغانستان کی طرف سکیورٹی کا فول پروف انتظام تو افغان حکومت ہی کی ذ مہ داری تھی‘ لیکن محسوس یہ ہوتا ہے کہ سکیورٹی کا معقول اور مناسب انتظام نہیں تھا جس کی وجہ سے دہشت گردی کا مذکورہ واقعہ پیش آیا۔ افغان حکومت کی یہ ذمہ داری ہے کہ اس واقعہ کی مکمل چھان بین کرے اور اس ملک کو بے نقاب کرے جو پاکستان اور افغانستا ن کے درمیان بد اعتمادی کی فضا پید اکرنا چاہتا ہے ۔
