گوجرانوالہ (نوائے وقت رپورٹ) گزشتہ کچھ عرصے میں کئی غیر ملکی خواتین پاکستانی مردوں سے شادی کے لیے اپنے وطن کو خیرباد کہہ کر یہاں چلی آئیں جن کی کہانیاں سوشل میڈیا پر مقبول ہوئیں۔ حال ہی میں ایک روسی لڑکی بھی پاکستانی لڑکے کی محبت میں گرفتار ہو کر اپنے ملک کو چھوڑ کر پاکستان چلی آئی اور اس نے اسلام قبول کر کے شادی بھی کر لی۔ گوجرانوالا کے محمد علی یوسفی اور روس کی پیلینا کی ملاقات سوشل میڈیا پر ہوئی۔ اس حوالے سے محمد علی یوسفی کا کہنا ہے کہ میں بیرونِ ملک مقیم تھا جب ہماری دوستی پروان چڑھی، میسجز  پر ہی پیلینا نے کہا کہ مجھے آپ کا مزاج اور خواتین سے عزت سے بات کرنے کا انداز بے حد پسند ہے۔ علی یوسفی کے مطابق ہماری دوستی اتنی گہری ہوگئی کہ ہم نے شادی کا سوچا، پیلینا کا تعلق کسی مذہب سے نہیں اسی لیے انہوں نے اسلام قبول کر لیا، جس کے بعد ہماری شادی ہوگئی اور  پیلینا روس چھوڑ کر گوجرانوالا چلی آئی۔ پیلینا نے بتایا کہ انہیں روٹی اور پراٹھا بہت اچھا بنانا آتا ہے۔ انہیں پاکستان کے شمالی علاقہ جات بھی پسند ہیں۔ پاکستانی کلچر بہت پسند ہے اور  روسی طور طریقوں کو پسند نہیں کرتی تھیں۔