امریکی ٹیرف کا نفاذ: چیلنجز سے نمٹنے کیلئے فوری اقدامات کیے جائیں:افتخار علی  

لاہور(کامرس رپورٹر) سارک چیمبر آف کامرس اینڈ انڈسٹری کے سابق صدر افتخار علی ملک نے امریکی صدر ٹرمپ کی طرف سے حالیہ ٹیرف کے نفاذ کے نتیجے میں پیدا ہونے والے چیلنجز سے نمٹنے کیلئے اقدامات کی فوری ضرورت پر زور دیا ہے۔ علاقائی تعاون اور سارک کے درمیان علاقائی تجارت کو مضبوط، زیادہ لچکدار پالیسی اور بڑی طاقتوں پر انحصار کم کر کے پاکستان اپنی معیشت کو محفوظ اور مستحکم کر سکتا ہے۔ ٹیرف کے اثرات کو کم کرنے کیلئے پاکستان کو کثیر الجہتی حکمت عملی اپنانا ہوگی۔ اس کیلئے برآمدی منڈیوں میں تنوع اور تجارتی روابط کو وسعت دینا ضروری ہے۔ افریقہ، وسطی ایشیا اور یورپی یونین کے ساتھ تجارتی روابط کو کو فروغ دیا جائے اور برآمدات کو مزید مسابقتی بنانے کیلئے صنعت اور ٹیکنالوجی میں جدت کو فروغ دیا جائے۔ کاروبار کرنے میں آسانیاں پیدا کی جائیں اور سیاسی استحکام کو بہتر بنایا جائے تو عالمی غیر یقینی صورتحال کے باوجود غیر ملکی سرمایہ کاروں کو راغب کرنے میں مدد ملے گی۔ ٹیکسٹائل اور مینوفیکچرنگ کے شعبے، جو درآمدی خام مال اور مشینری پر بہت زیادہ انحصار کرتے ہیں عالمی قیمتوں میں اتار چڑھائو سے بہت زیادہ متاثر ہوتے ہیں۔ غیر ملکی سرمایہ کاری کو راغب کرنے اور تحفظ فراہم کرنے کیلئے پالیسی اصلاحات اور عالمی ویلیو چینز میں بہتر انضمام سے بیرونی دبائو کو کم کرنے میں مدد ملے گی۔