مہنگائی میں اضافہ 22اشیاء کی قیمتیں بڑھ گئیں 5سستی ادارہ شماریات
کراچی‘ اسلام آباد (کامرس رپورٹر + نمائندہ خصوصی) مارچ کے پہلے ہفتے میں مہنگائی میں اضافے کی اوسط شرح 20 فیصد سے بھی تجاوز کر گئی۔ چکن، چاول، چینی، آلو، پیاز، گھی، دالوں، گوشت، دودھ سمیت کھانے پینے اور روزمرہ استعمال کی 22 بنیادی اشیاء کی قیمتوں میں اضافہ ریکارڈ کیا گیا۔ پاکستان ادارہ شماریات کے مطابق رواں ہفتے کے دوران چکن کی اوسط قیمت میں ساڑھے تیرہ روپے فی کلو کا اضافہ دیکھا گیا۔ چینی کی فی کلو قیمت میں 2 روپے 64 پیسے، دال ماش کی 3 روپے 37 پیسے، آلو کی فی کلو اوسط قیمت میں 1 روپے 40 پیسے اور کیلوں کی فی درجن قیمت میں 3 روپے 65 پیسے کا اضافہ ریکارڈ کیا گیا۔ رواں ہفتے کے دوران پیاز، انڈوں، چاول، تازہ دودھ، دہی، دال چنا، دال مسور، مٹن، اور بیف کی قیمت بھی بڑھ گئی، کپڑا، صابن اور ایل پی جی بھی مہنگی ہو گئی۔ ہفتے کے دوران صرف 5 اشیا کی قیمت کم ہوئی۔رپورٹ کے مطابق رواں ہفتے کے دوران کھانے پینے اور روز مرہ استعمال کی 51 بنیادی اشیاء میں سے 41 گزشتہ سال کے مقابلے میں 143 فیصد تک مہنگی فروخت ہوئیں سرخ مرچ گزشتہ سال کے مقابلے میں 143 فیصد مہنگی ہو چکی ہے، چکن کی قیمت 72 فیصد، انڈوں کی 62 فیصد اور چینی کی قیمت گزشتہ سال کے مقابلے میں 21 فیصد زیادہ ہو گئی۔ بجلی گزشتہ سال کے مقابلے میں 86 فیصد مہنگی ہوئی۔ پاکستان ادارہ شماریات کے مطابق مارچ کے پہلے ہفتے میں ہفت روزہ بنیاد پر مہنگائی میں اضافے کی اوسط شرح 14.95 فیصد رہی، تاہم خوراک زیادہ مہنگی ہونے کی وجہ سے غریب طبقے کے لیے مہنگائی کی شرح 20.07 فیصد تک پہنچ گئی۔
