کراچی(نیوز رپورٹر)جاپانی پلس ڈبلیو ہیومن کیپیٹل ایکسچینج کمپنی کے وفد نے پیرکے روز جامعہ کراچی کا دورہ کیا اور جامعہ کراچی کے وائس چانسلر پروفیسر ڈاکٹر خالد محمود عراقی سے ان کے دفتر میں ملاقات کی۔ ہیومن کیپیٹل ایکسچینج کمپنی کے ایگزیکٹو وائس پریزیڈنٹ وچیف آپریٹنگ آفیسرتاکاشی ہوریوچی نے وائس چانسلر جامعہ کراچی کو بتایا کہ جاپان ٹیکنالوجی پر عبور حاصل ہونے کی وجہ سے آئی ٹی ،صنعتوں اور تحقیق کے میدان میں تیزی سے ترقی کررہاہے۔انہوں نے کہا کہ 2000 سے زائد پاکستانی نوجوان پہلے ہی ہیومن کیپیٹل ایکسچینج کمپنی سے وابستہ ہیں اور آئی ٹی کے مختلف ذیلی شعبوں میں کام کر رہے ہیں۔ وہ بنیادی طور پر ایسے طلبا کی تلاش میں ہیں جو بنیادی اور جدید مصنوعی ذہانت، ڈیٹا سائنس، اور انٹرنیٹ آف تھنگز کورسز اور دیگر سرکردہ آئی ٹی شعبوں پر مضبوط کنٹرول رکھتے ہوں۔انہوں نے بتایا کہ جاپان میں آبادی کم ہورہی جس کی وجہ سے جاپان میں ہنرمندافراد کی شدید کمی کا سامنا ہے اور جاپان اس طرح کے چیلنجز پر قابوپانے اور عالمی معاشرے میں اپناحصہ ڈالنے کے لئے باصلاحیت اور ہنر مندافرادی قوت میں اضافے کا خواہشمند ہے۔اس موقع پر جمیل احمد قریشی نے کہا کہ ہنرمندافراد اور بالخصوص انفارمیشن ٹیکنالوجی انجینئرز کو بیرون ممالک میں روزگارکے مواقع فراہم کرنے کے لئے کوشاں ہے۔پاکستان اور جاپان کے مابین مشترکہ منصوبے تیار کرنا اور اس پر کام کرنا مستقبل کے لئے خوش آئند ثابت ہوگا۔ہیومن کیپیٹل ایکسچینج کمپنی قابل ذکر پاکستانی یونیورسٹیوں کے ساتھ تعاون کرنے کی خواہاں ہے اور جامعہ کراچی کے وائس چانسلر سے ملاقات بھی اسی سلسلے کی ایک کڑی ہے اور اس طرح جامعہ کراچی اور جاپانی جامعات کے مابین روابط قائم ہوں گے اور فروغ ملے گا۔جامعہ کراچی کے وائس چانسلر پروفیسر ڈاکٹر خالد محمود عراقی نے اس تجویز کا خیر مقدم کرتے ہوئے کہا کہ کمپیوٹر سائنس کے شعبہ کے طلباءجاپانی کمپنیوں کے لیے کام کرنے اور جاپان کی معروف یونیورسٹیوں کے فیکلٹی ممبران سے سیکھنے کے بعد یقیناً بہت سے فوائد حاصل کریں گے۔انہوں نے کہا کہ جاپانی اور پاکستانی جامعات کے اساتذہ اور طلبہ ایک دوسرے کے تجربات سے بہت کچھ سیکھ سکتے ہیں اور اس طرح پائیدار تعاون بھی قائم کیاجاسکتاہے۔

ترکی : بس حادثہ، 8 افراد ہلاک، درجنوں زخمی

پروفیسر ڈاکٹر خالد محمودعراقی