کراچی ، ایک اور شہری ڈکیتی مزاحمت کی بھینٹ چڑھ گیا
کراچی(نیوز رپورٹر)محمود آباد کے علاقے اعظم ٹائون میں ڈاکوئوں نے لوٹ مار کی واردات کے دوران مزاحمت کرنے پر دودھ کی دکان کے مالک کو فائرنگ کر کے ہلاک کر دیا اور لوٹ مار کر کے فرار ہوگئے ۔مقتول دودھ فروش 3 بچوں کا باپ تھا ۔ محمودآباد پولیس نے واردات کی سی سی ٹی وی فوٹیج حاصل کر لی۔ واردات میں ملوث ملزمان کم عمر اور افغان باشندے لگتے ہیں ۔ترجمان کراچی پولیس کے مطابق مقدس مسجد سیکٹر 10 اعظم ٹائون میں دودھ کی دکان پر فائرنگ سے ایک شخص زخمی ہوگیا ، جسے موٹرسائیکل پر جناح اسپتال لایا گیا، تاہم وہ دوران علاج زخموں کی تاب نہ لاتے ہوئے جاں بحق ہوگیا۔مقتول کی شناخت 35 سالہ خرم ولد اشرف کے نام سے کی گئی۔مقتول کے پڑوسی نے بتایا کہ خرم 3 بچوں کا باپ اور اختر کالونی ہی کا رہائشی تھا جب کہ اس کا آبائی تعلق پنجاب سے تھا ۔واقعے کے وقت 2 ڈاکو دکان پر لوٹ مار کرنے آئے تھے اور رقم چھیننے کے دوران خرم نے مزاحمت کی تو گولی ماردی اور رقم لے کر فرار ہوگئے۔مقتول پانچ وقت کا نمازی اور اس کا کسی سے کوئی ذاتی جھگڑا بھی نہیں تھا۔پولیس نے جائے وقوع سے نائن ایم ایم پستول کے 2 خول حاصل کر لیے جب کہ دکان کے اطراف میں لگے سی سی ٹی وی کیمرے کی فوٹیجز بھی حاصل کرلی گئی ہیں، جن کے مطابق ملزمان کو واردات کے لیے پیدل آتے ہوئے واضح طور پر دیکھا گیا ہے۔ملزمان کم عمر اور افغان لگتے ہیں۔ شبہ ہے کہ ملزمان اسی علاقے کے ہیں۔ملزمان نے پہلے دودھ کی دکان میں ڈکیتی کی پھر فرار ہونے کے لیے شہری سے موٹرسائیکل چھیننے کی کوشش کی ، اس دوران فائرنگ بھی کی، تاہم موٹرسائیکل سوار شہری ملزمان سے بچ کر بھاگنے میں کامیاب ہوگیا۔ واردات کے بعد موٹرسائیکل نہ ملنے پر ملزمان تنگ و تاریک گلیوں سے فرار ہوگئے۔سی سی ٹی وی فوٹیجز میں ملزمان کے چہرے واضح نظر نظر آ رہے ہیں۔پولیس حکام کے مطابق ملزمان کو جلد گرفتار کرلیا جائے گا۔
