لاہور(اسپورٹس رپورٹر)کامن ویلتھ گیمز 2022 میں پاکستان کےلئے گولڈ میڈل جیت کر ریکارڈ بنانے والے نوح دستگیر بٹ نے شاندار کامیابی پر اپنے محسوسات کا اظہار کرتے ہوئے کہا ہے کہ جذبات سے لبریز ایک طوفان کی کیفیت میں گزرے ہیں، اپنے خوابوں کو تعبیر ملتے، سپنوں کو سچ ہوتے دیکھنا حیرت انگیز احساس ہے۔ میرا فون ٹوٹ چکا ، میرے پاس ایک آئی فون ہے لیکن اس وقت اس میں سم کارڈ قابل استعمال نہیں ۔نوح دستگیر بٹ نے ویٹ لفٹنگ کے مقابلے میں مجموعی طور پر 405 کلو گرام وزن اٹھاکر ریکارڈ بنایا اور گولڈ میڈل جیتا تھا۔انہوں نے کہا کہ شروع سے ہی میرا مقصد ان کھیلوں میں گولڈ میڈل حاصل کرنا تھا اور اس مقصد کو حاصل کرنے کیلئے اپنا جو کچھ میں لگا سکتا تھا، وہ سب میں نے لگادیا۔ یہ محنت کا پھل ہے، وہ محنت جو ہم تربیت اور مشقوں کے دوران کرتے ہیں، اس کھیل کے لیے تربیتی پلان اور طریقہ کار بہت سخت ہے، خود کو فٹ رکھنے اور کھیل پر توجہ مرکوز رکھنے کے لیے ہر روز 2 مرتبہ 3 گھنٹے کی تربیت اور مشق کرنی پڑتی ہے۔ میں یہ کامیابی اپنے والد کےلئے حاصل کرنا چاہتا تھا، میں نے ان سے وعدہ کیا تھا کہ میں گولڈ میڈل جیتوں گا اور جیسے ہی میں نے میڈل جیتا تو اپنے خاندان کو فون کیا اور انہوں نے مجھے بتایا کہ وہ مجھے ٹیلی ویژن پر دیکھ رہے تھے، یہ میرے لیے ایک جذباتی لمحہ تھا۔جیت کے لمحات کو یاد کرتے ہوئے انہوں نے کہا کہ جب وہ میڈل وصول کر رہے تھے اور پاکستان کے قومی ترانے کی دھن سٹیڈیم میں چلائی گئی تو وہ ایسا موقع تھا کہ اس وقت محسوس کیے گئے جذبات کو الفاظ میں بیان نہیں کیا جا سکتا۔ وہ یہاں سے ترکی میں 9 اگست سے شروع ہونے والے اسلامک گیمز میں شرکت کےلئے جا رہے ہیں، میں وہاں ملک کےلئے ایک اور گولڈ میڈل جیتنا چاہتا ہوں۔

آرمی چیف جنرل قمر جاوید باجوہ سرکاری دورے پر برطانیہ پہنچ گئے

مستقبل کے منصوبوں اور عزائم سے متعلق بات کرتے ہوئے نوح دستگیر بٹ کا کہنا تھا کہ اولمپکس کھیلوں کے عروج کا مقام ہے اور میرا مقصد پیرس اولمپکس کیلئے کوالیفائی کرنا اور وہاں ملک کیلئے میڈل جیتنا ہے۔ انھیں اور ملک کے دیگر ویٹ لفٹرز کو کھیلوں کے سب سے بڑے ایونٹ میں تمغے جیتنے کیلئے مزید تعاون کی ضرورت ہے۔