خطہ پاک ، صوفیاء کی دُعائوں کا ثمر ہے:میاں ابراراحمد،طاہر رضا بخاری
لاہور (خصوصی نامہ نگار)سیکرٹری اوقاف پنجاب میاں ابرار احمد اور ڈائریکٹرجنرل اوقاف پنجاب ڈاکٹر طاہر رضا بخاری نے داتاؒد ربار میں منعقدہ ’’ کانفرنس بسلسلہ استحکام پاکستان عصرِ حاضر کے تناظر میں‘‘سے خطاب کرتے ہوئے کہا کہ استحکامِ پاکستان کیلئے محراب ومنبر مستعد اور دفاع وطن کے تقاضوں سے عہدہ برا ہونے کیلئے پُر عزم ہیں ۔ خطہ پاک ، صوفیاء کی دُعائوں کا ثمر ہے ۔محراب ومنبر ملکی استحکام کا ضامن ہے، علما اور دینی قوتیں ، قومی یکجہتی اور اتحادواتفاق کے فروغ میں اساسی اور کلیدی کردار ادا کرتے رہیں گے ۔ یوم آزادی کے حوالے سے ،داتاؒ دربار میں منعقدہ عظیم الشان استحکام پاکستان کانفرنس جس میں مفتی محمد رمضان سیالوی سمیت وطنِ عزیز کی معتبر شخصیات نے شرکت کی۔ دفاع وطن کیلئے پوری قوم متحد ہے ۔ملکی استحکام اور قومی یکجہتی ہماری اولین ترجیح ہے ۔پوری قوم ملکی دفاع کیلئے افواج پاکستان کے شابہ بشانہ کھڑی ہے ۔اس موقع پر زونل ایڈ منسٹریٹر اوقاف داتا ؒ دربار شاہد حمید ورک ، منیجر اوقاف داتاؒ دربار شیخ جمیل احمد سمیت علمی ،دینی اورروحانی حلقوں کی ممتاز شخصیات بھی موجود تھیں۔
