پاکستان کی جانب سے میانمار کے زلزلہ متاثرین کیلئے امداد کی دوسری کھیپ روانہ 

اسلام آباد(اپنے سٹاف رپورٹر سے)وزیر اعظم پاکستان کی ہدایت پر این ڈی ایم اے نے میانمار کیزلزلہ متاثرین کے لیے 70 ٹن ہنگامی فلاحی امداد روانہ کر دی۔ امدادی سامان دو چارٹرڈ پروازوں کے ذریعے روانہ کی گئی۔ خطے میں حالیہ تباہ کن زلزلے کے باعث شدید نقصان کے پیش نظر یہ امداد روانہ کی گئی۔ایئر کارگو پرواز کے ذریعے 35 ٹن ضروری امدادی سامان پر مشتمل دوسری کھیپ اسلام آباد انٹرنیشنل ایئرپورٹ سے میانمار کے شہر ینگون کے لیے روانہ ہوگئی۔ اس کھیپ میں خیمے، ترپال، کمبل، پانی کے ٹینک، ادویات اور تیار کھانے کے پیکٹ شامل تھے۔ امدادی سامان بھیجنے کا مقصد میانمار میں متاثرہ آبادی کو فوری امداد فراہم کرنا ہے۔قبل ازیں، میانمار میں پاکستان کے مشن نے 35 ٹن امدادی سامان پر مشتمل پہلی کھیپ ینگون ریجن کے وزیر اعلیٰ کے حوالے کی جو متاثرین میں تقسیم کے لئے روانہ کی گئی۔