پاکستان نے سری لنکا کے خلاف ٹی ٹونٹی سیریز کے پہلے میچ میں ٹاس جیت کر پہلے فیلڈنگ کرنے کا فیصلہ کیا ہے جبکہ اس وقت سری لنکا کی بیٹنگ جاری ہے۔
پہلے ٹی ٹوئنٹی میں سری لنکا کی پاکستان کے خلاف پہلے بیٹنگ جاری ہے اور آئی لینڈرز نے 5 اوورز میں بغیر کسی نقصان کے 50 رنز بنا لیے ہیں۔قذافی اسٹیڈیم میں کھیلے جارہے تین میچوں کی سیریز کے پہلے مقابلے میں قومی ٹیم کے کپتان سرفراز احمد نے ٹاس جیت کر فیلڈنگ کو ترجیح دیتے ہوئے مہمان ٹیم کو پہلے بیٹنگ کی دعوت دی۔ٹاس کے موقع پر کپتان سرفراز احمد کا کہنا تھا کہ رات میں اوس پڑنے کا امکان ہے اس لیے فیلڈنگ کا فیصلہ کیا جب کہ مہمان ٹیم کے کپتان نے کہا کہ کوشش کریں گے 170 رنز کا ہدف دیں۔
طویل عرصے سے ٹیم سے باہر رہنے والے احمد شہزاد اور عمر اکمل کی واپسی ہوئی ہے اور وہ فائنل الیون کا حصہ ہیں، ذرائع کا کہنا ہے احمد شہزاد اور بابر اعظم سے اوپننگ کرانے کا فیصلہ کیا گیا ہے جب کہ فاسٹ باولنگ کا بوجھ، محمد عامر، محمد حسنین اور فہیم اشرف اٹھائیں گے، افتخار احمد، عمر اکمل، آصف علی، شاداب خان اور عماد وسیم بھی ٹیم میں شامل ہیں۔
واضح رہے کہ پاکستان نے کئی اسٹار کرکٹرز کے بغیر میدان میں اترنے والی سری لنکن ٹیم کیخلاف ون ڈے سیریز 2-0 سے اپنے نام کی تھی، مسلسل 2 میچز میں شکستوں کے باوجود مہمان ٹیم کے چند کھلاڑیوں کی انفرادی کارکردگی امید افزا رہی، کراچی میں غیر متوقع بارشوں کی وجہ سے پہلا میچ ممکن نہیں ہوسکا تھا۔