گیس چوری :پنجاب، خیبرپی کے، اسلام آباد میں 387 کنکشن منقطع

لاہور(کامرس رپورٹر)سوئی ناردرن گیس پائپ لائنز لمیٹڈ کی جانب سے گیس چوروں کیخلاف جاری کریک ڈاؤن کے دوران پنجاب، خیبرپختونخوا اور اسلام آباد کے مختلف علاقوں میں مزید 387 غیر قانونی گیس کنکشن منقطع کر دئیے گئے جبکہ گیس چوری پر 42 لاکھ روپے سے زائد کے جرمانے عائد کیے گئے۔ لاہور ریجن میں گیس کے غیر قانونی استعمال پر 124 اور کمپریسر کے استعمال پر 2 کنکشن منقطع کیے گئے جبکہ 19 لاکھ 30 ہزار روپے کے جرمانے عائد کیے گئے۔ فیصل آباد میں 43 غیر قانونی کنکشن منقطع کیے گئے اور 4 لاکھ 70 ہزار روپے کے جرمانے عائد ہوئے۔ شیخوپورہ میں 7 غیر قانونی کنکشن منقطع کیے گئے اور 3 لاکھ 10 ہزار روپے کا جرمانہ عائد کیا گیا۔ بہاولپور میں ٹیم نے 10 غیر قانونی کنکشن اور کمپریسر کے استعمال پر 79 کنکشن منقطع کیے۔ ساہیوال میں 5 کنکشن گیس چوری پر منقطع کیے گئے جبکہ 12 لاکھ 60 ہزار روپے سے زائد کے جرمانے عائد کیے گئے۔ گوجرانوالہ میں 1 غیر قانونی کنکشن منقطع کیا گیا اور 2 لاکھ 50 ہزار روپے کا جرمانہ عائد کیا گیا۔