خلائی مخلوق : وزیراعظم کا بیان خلاف آئین‘ شفاف انتخابات پر سمجھوتہ نہیں کرینگے : الیکشن کمشن
اسلام آباد (آئی این پی‘نوائے وقت رپورٹ) ترجمان الیکشن کمشن نے وزیراعظم کے خلائی مخلوق والے بیان کی سختی سے تردید کرتے ہوئے کہا ہے کہ یہ بیان آئین کی روح اور الیکشن کمشن کے مینڈیٹ کے خلاف ہے۔ ترجمان الیکشن کمشن نے اپنے بیان میں کہا ہے کہ الیکشن کمشن پاکستان 2018ءکے عام انتخابات کےلئے مکمل تیار ہے۔ آئین کے آرٹیکل 218 کے تحت آزادانہ، منصفانہ اور غیر جانبدارانہ انتخابات کروانا الیکشن کمشن کے فرائض منصبی ہے۔ الیکشن کمشن 4مئی 2018ءکی اس خبر جس میں کہا گیا انتخابات کوئی خلائی مخلوق کرائےگی کی سختی سے تردید کرتا ہے۔ آئین کے آرٹیکل 218اور 220اور الیکشن ایکٹ 2017ءکے سیکشن 11,10,9,8,6,5,4 کے تحت الیکشن کمشن اپنی آئینی اور قانونی ذمہ داریوں میں مکمل آزاد ہے۔ ملک کے انتہائی اہم آئینی منصب پر فائز شخصیت کو ایسے بیانات سے گریز کرنا چاہئے جو محض مفروضوں اور قیاس آرائیوں پر مبنی ہوں ایسے بیانات آئین کا تمسخر اڑانے کے مترادف ہیں۔ ترجمان الطاف خان نے واضح کیا کہ الیکشن کمشن ملک میں صاف، شفاف اور غیرجانبدار انتخابات پر کوئی سمجھوتہ نہیں کرے گا۔ یاد رہے وزیراعظم شاہد خاقان عباسی نے جمعرات کے روز سپیکر عشائیہ میں خطاب کرتے ہوئے کہا تھا انتخابات نگران حکومت نہیں، خلائی مخلوق کرائے گی لیکن ہم پھر بھی حصہ لیں گے۔
الیکشن کمشن