پاک فوج مادر وطن کے دفاع کیلئے ہر وقت تیار ہے، آزمودہ کار اور ہر طرح کے چیلنج سے نمٹنے کی صلاحیت رکھتی ہے۔ جنرل قمر جاوید باجوہ
آرمی چیف جنرل قمر جاوید باجوہ نے کہا ہے کہ پاک فوج مادر وطن کے دفاع کیلئے ہر وقت تیار ہے اور آزمودہ کار اور ہر طرح کے چیلنج سے نمٹنے کی صلاحیت رکھتی ہے۔ پاک فوج کے شعبہ تعلقات عامہ آئی ایس پی آر کے مطابق آرمی چیف نے بہائولپور کے قریب سٹرائیک کور کی مشترکہ مشقوں کا معائنہ کیا ، مشقوں میں پاک فضائیہ کے لڑاکا طیاروں نے حصہ لیا۔ رائل سعودی بری فوج کے دستوں نے بھی مشقوں میں شرکت کی ۔ آرمی چیف نے شرکاء کی اعلیٰ کارکردگی اور تربیتی معیار کو سراہتے ہوئے کہاکہ جنگ میں پاک فوج کی اسٹرائیک کور کا کردار فیصلہ کن ہوتا ہے۔ آرمی چیف نے سعودی بری فوج کے دستے کی اعلیٰ تربیتی معیار کی بھی تعریف کی۔
