ملک کے مختلف شہروں میں بارش کا نیا سلسلہ شروع ہوگیا۔ پنجاب اور بلوچستان کے مختلف شہروں میں وقفہ وقفہ سے بارش نے موسم خوشگوار بنادیا۔ کوہ سلیمان کے برساتی نالوں میں طغیانی آگئی ۔ملک میں بارش کا نیا سسٹم داخل ہو گیا۔ پنجاب اور بلوچستان میں بادل برس پڑے۔ پنجاب کے شہروں وہاڑی، میلسی، کوٹ ادو، چیچہ وطنی اور ٹوبہ ٹیک سنگھ سمیت مختلف شہروں میں موسلادھار بارش ہورہی ہے۔ انتظامی نااہلی نے ابر رحمت کو زحمت بنا ڈالا۔ بارش شروع ہوتے ہیں بجلی کے متعدد فیڈرز ٹرپ کرگئے۔ کئی شہروں میں بجلی غائب ہوگئی۔ کوہ سلیمان میں موسلا دھار بارش سے ندی نالوں میں طغیانی آگئی۔ برساتی ندی سخی سرور میں طغیانی کے باعث 4 بسیں بہہ گئیں جبکہ عارضی دکانیں بھی متاثر ہوئی ہیں۔
بلوچستان میں بھی بارش نے موسم خوشگوار بنادیا ہے۔ کوہلو، زیارت، پشین، سبی اور بولان میں موسلادھار بارش ہوئی۔