امید ہے پاک فوج انتخابات کے خوش اسلوبی اور پرامن انداز میں انعقاد کو یقینی بنانے کی کاوشوں میں معاون ہوگی: نگران وزیراعظم جسٹس (ر)ناصر الملک
نگران وزیراعظم جسٹس (ر)ناصر الملک نے امید ظاہر کی ہے کہ آئندہ عام انتخابات کے دوران فوجی اہلکاروں کی تعیناتی عام انتخابات کے خوش اسلوبی اور پرامن انداز میں انعقاد کو یقینی بنانے کی کاوشوں میں معاون ہوگی۔ انہوں نے یہ بات بدھ کو وزیراعظم آفس میں وزارت دفاع کے امور کار کے بارے میں بریفنگ کی صدارت کرتے ہوئے کہی۔ وزیر دفاع لیفٹیننٹ جنرل(ر)نعیم خالد لودھی، وزیراعظم کے سیکرٹری سہیل عامر، سیکرٹری دفاع لیفٹیننٹ جنرل(ر) ضمیر الحسن شاہ اور سینئر حکام بھی ملاقات میں موجود تھے۔ سیکرٹری دفاع لیفٹیننٹ جنرل (ر)ضمیر الحسن شاہ نے وزارت کی کارکردگی کے بارے میں تفصیلی بریفنگ دی۔ انہوں نے وزیراعظم کو عام انتخابات 2018 کے دوران فوجی اہلکاروں کی تعیناتی کے بارے میں آگاہ کیا۔ وزیراعظم نے مادر وطن کے دفاع کے حوالے سے وزارت کے اہم کردار کی تعریف کی۔ انتخابی عمل کے دوران فوجی اہلکاروں کی تعیناتی کے حوالے سے انہوں نے ماضی کے ضمنی انتخابات کے کامیاب تجربہ کا ذکر کیا۔ نگران وزیراعظم نے امید ظاہر کی کہ فوجی اہلکاروں کی معاونت عام انتخابات کے احسن اور پرامن انعقاد کو یقینی بنانے کی کاوشوں میں مددگار ہوگی۔