پاکستان نیوی فلیٹ کی سالانہ ایفیشنسی پریڈ ڈاکیارڈ کراچی میں منعقد‘ نیول چیف مہمان خصوصی

اسلام آباد (خبر نگار خصوصی) پاکستان نیوی فلیٹ کی سالانہ ایفیشنسی کمپیٹیشن پریڈ پاکستان نیوی ڈاکیارڈ کراچی میں منعقد ہوئی۔ چیف آف دی نیول سٹاف ایڈمرل نوید اشرف نے تقریب میں بطور مہمان خصوصی شرکت کی۔ ترجمان کے مطابق ڈاکیارڈ آمد پر کمانڈر پاکستان فلیٹ ریئر ایڈمرل عبدالمنیب نے مہمان خصوصی کا استقبال کیا اور چاق و چوبند دستے نے انہیں گارڈ آف آنر پیش کیا۔ چیف آف دی نیول سٹاف نے اپنے خطاب میں پاک بحریہ کے فلیٹ کی آپریشنل تیاریوں پر مکمل اطمینان اور اعتماد کا اظہار کیا۔ ایڈمرل نوید اشرف نے میری ٹائم سکیورٹی اور پاکستان کی سی لائنز آف کمیونیکیشن کے تحفظ کیلئے پاکستان نیوی فلیٹ کی خدمات کو سراہا۔ نیول چیف نے سٹرٹیجک میری ٹائم زون بالخصوص گوادر پورٹ اور CPEC کے میری ٹائم سے متعلقہ منصوبوں کی حفاظت کو یقینی بنانے کے لیے پاک بحریہ کی کوششوں پر روشنی ڈالی۔ مزید برآں، انہوں نے خطے میں ابھرتے ہوئے میری ٹائم سکیورٹی ماحول کا بھی ذکرکیا جس کے  پیش نظر پاک بحریہ کو ہمیشہ اپنی بحری سرحدوں کے دفاع کے لیے تیار رہنا ضروری ہے۔ قبل ازیں، اپنے استقبالیہ خطاب میں کمانڈر پاکستان فلیٹ نے گزشتہ سال کے دوران پی این فلیٹ کی آپریشنل کامیابیوں پر روشنی ڈالی۔ علاوہ ازیں متعدد علاقائی میری ٹائم سکیورٹی پیٹرول اور غیر ملکی تعیناتیاں بھی کی گئیں۔ تقریب کے دوران سربراہ پاک بحریہ نے بہترین کارکردگی کا مظاہرہ کرنے والے سکواڈرنز اور یونٹس کو ایفیشنسی ایوارڈز اور ٹرافیاں پیش کیں۔