وفاقی وزیر برائے مواصلات مراد سعید نے کہا ہے کہ ہم سب کو کشمیر کاز کو قومی بیانیہ بنانا چاہیے، وزیراعظم عمران خان عالمی سطح پر کشمیروں کے سفیر اور عالم اسلام کے ترجمان بنے ہیں، مسئلہ کشمیر کے حل کیلئے ہم آخری حد تک جائیں گے`، کشمیریوں کے ساتھ مضبوط پاکستان کھڑا ہے اور امید ہے کہ کشمیریوں کی خواہشات اور امیدوں کے مطابق مسئلہ کشمیر حل ہوگا، عالمی سطح پر کشمیریوں کے ساتھ اظہار یکجہتی کا مظاہرہ کرتے ہوئے مودی کا چہرہ بے نقاب ہوچکا ہے، حقیقت میں بھارت دہشت گرد ہے اور مودی ہٹلر ، مسئلہ کشمیر پر ہم سب کو متحد ہو کر کشمیریوں کی بات کرنی چاہیے۔ ان خیالات کا اظہار انہوں نے منگل کو کنونشن سنٹر اسلام آباد میں کشمیریوں سے اظہار یکجہتی اور کشمیر کاز کو اجاگر کرنے کیلئے یوتھ کانفرنس سے بطور مہمان خصوصی خطاب کرتے ہوئے کیا۔ کانفرنس کا انعقاد این ایچ اے اور اسلام آباد کی ضلعی انتظامیہ کے تعاون سے کیا گیا۔ اس موقع پر وفاقی وزیر برائے امور کشمیر علی امین خان گنڈاپور، سینیٹر فیصل جاوید، ڈپٹی کمشنر اسلام آباد حمزہ شفقات، اسلام آباد کے مختلف سکولوں کے طلباءو طالبات، نیلسن منڈیلا کا رشتہ دار چیمبو موزی اور دیگر حکام بھی موجود تھے۔ یوتھ کانفرنس سے خطاب کرتے ہوئے مراد سعید نے کہا کہ کشمیریوں سے اظہار یکجہتی کیلئے سکول کے طلباءو طالبات کی جانب سے پرفارمنس پر انھیں خراج تحسین پیش کرتا ہوں، کشمیر کاز کے حوالے سے اسلام آباد کی ضلعی انتظامیہ کا بھی بے حد مشکور ہوں جنہوں نے اس ایونٹ کیلئے بھرپور انتظامات کیے۔ وفاقی وزیر نے کہاکہ 1986ءکے بعد تقریباً ایک لاکھ سے زائد کشمیری بہن بھائی شہید ہو چکے ہیں، انہوں نے کشمیر کاز اور آزادی کیلئے قربانیاں دی ہیں، ہمیں کشمیر کاز کو آگے لے کر جانا چاہیے۔وزیر مواصلات نے کہا کہ وزیراعظم عمران خان نے عالمی سطح پر کشمیریوں کے ساتھ اظہار یکجہتی کا مظاہرہ کرتے ہوئے مودی کا چہرہ بے نقاب کر دیا ہے، حقیقت میں بھارت دہشت گرد اور مودی ہٹلر ہے، مودی دنیا کے سامنے بے نقاب ہو چکا ہے۔انھوں نے کہا کہ کشمیری بھائیوں پر مظالم کے حوالے سے ہم عالمی سطح پر بھارت کا مکروہ چہرہ بے نقاب کر رہے ہیں تاکہ وہ کشمیریوں پر ظلم بند کرے،دنیا کو ہم دھمکی نہیں دے رہے بلکہ انہیں خبردار کر رہے ہیں کہ اگر مسئلہ کشمیر پرامن طریقے سے حل نہ ہو سکا تو دونوں ممالک کے درمیان ایٹمی جنگ کا خطرہ لاحق ہو سکتا ہے۔ انہوں نے کہاکہ وزیراعظم نے بھی کہا ہے کہ ہم غلامی نہیں بلکہ آزادی کیلئے لڑ رہے ہیں، ہم کشتیاں جلا چکے ہیں اور کشمیر کو آزاد کرا کے رہیں گے۔ مراد سعید نے کہاکہ 54 سال سے کشمیر ایشو پر پوری دنیا خاموش تماشائی بنے ہوئی تھی لیکن وزیراعظم عمران خان نے جس طرح کشمیر کاز کو عالمی سطح پر اجاگر کیا گزشتہ چھ ماہ سے اس مسئلہ پر عالمی سطح پر تین مرتبہ بحث ہو چکی ہے۔ انہوں نے کہاکہ بھارت کے اندر بھی اختلافات پیدا ہو چکے ہیں اور مودی کی پالیسیوں کے خلاف مظاہرے شروع ہو چکے ہیں۔ انہوں نے کہاکہ سیاست ہر کسی کا الگ الگ معاملہ ہے لیکن مسئلہ کشمیر پر ہم سب کو متحد ہو کر کشمیریوں کی بات کرنی چاہیے۔ انہوں نے کہاکہ عمران خان کا ایک ہی پیغام ہے کہ کشمیر بنے گا پاکستان اور انہوں نے کشمیریوں سے وعدہ کیا ہے کہ وہ عالمی سطح پر بطور کشمیر کا سفیر بن کر ان کا مقدمہ لڑیں گے۔ انہوں نے کہاکہ وزیراعظم عمران خان عالمی فورم پر کشمیر کا سفیر بن کر ان کا مقدمہ لڑ رہے ہیں، ہم سب کو مسئلہ کشمیر اجاگر کرنا چاہیے،تعلیمی ادارے اور طلباءو طالبات بھی کشمیریوں سے اظہار یکجہتی کیلئے اپنا کردار ادا کریں۔ وفاقی وزیر نے کہاکہ بھارتی قابض افواج نے ظلم اور بربریت کا مظاہرہ کرتے ہوئے برہان وانی کو شہید کیا تھا لیکن اس تحریک نے مزید شدت اختیار کرتے ہوئے ہزاروں اور لاکھوں برہان وانی پیدا کیے،کشمیریوں کا پاکستان سے محبت کا اتنا جذبہ ہے کہ وہ سبز ہلالی پرچم میں شہیدوں کو دفناتے ہیں، ان کا ایک ہی نعرہ ہے کہ ہم سب پاکستانی اور پاکستان ہمارا ہے لیکن ہمارا بھی یہ نعرہ ہے کہ کشمیر ہمارا اور ہم کشمیر کے ہیں۔ انہوں نے کہاکہ وزیراعظم عمران خان بدھ کو ( آج )آزاد کشمیر کی قانون ساز اسمبلی سے خطاب کریں گے۔ انہوں نے کہاکہ کشمیر کاز کے حوالے سے سکولوں کے بچوں کو کشمیر کاز کو نیشنل بنانا چاہیے اور کشمیر کی آزادی تک ہم اکٹھے رہیں گے اور کشمیر کے شہدا اور بھائیوں کو خراج تحسین پیش کرتے ہیں۔ انہوں نے کہاکہ مسئلہ کشمیر کو سوشل میڈیا پر بھی اجاگر کرنا چاہیے اور سوشل میڈیا کے ذریعے مقبوضہ کشمیر کے حوالہ سے دنیا کو باخبر رکھنے میں کردار ادا کرنا چاہیے۔ انہوں نے کہاکہ مودی نے کشمیر پر ظلم اور بربریت کی انتہا کر دی ہے، اس کی غلط پالیسیوں کی وجہ سے بھارت کے اندر سے بھی آوازیں آرہی ہیں، کشمیریوں کے ساتھ مضبوط پاکستان کھڑا ہے اور عمران خان جیسا لیڈر جو پاکستان کی قیادت کر رہے ہیں، عالمی سطح پر ان کی بات مانی جاتی ہے۔

 نااہل حکمران انتقامی کاروائیوں میں اندھے ہوچکے :خرم دستگیر