وکلاء کے انکا ر پر 3 کشمیری طلبہ کا براہ راست ہائیکورٹ سے رجوع
الہ آباد (اے پی پی) بھارت میں آگرہ کے ایک کالج میں زیر تعلیم تین کشمیری طلبا جنہیں بغاوت اور سائبر دہشت گردی کے الزامات کے تحت گرفتار کیا گیا تھا، نے ضمانت کیلئے براہ راست الہ آباد ہائی کورٹ کا دروازہ کھٹکھٹایا ہے۔ طلبا کا کہنا ہے کہ ان کے وکلاء نے ضمانت کیلئے ان کے مقدمے کی عدالت میں پیروی کرنے سے انکار کر دیا ہے۔ کشمیر میڈیا سروس کے مطابق تینوں طلبا کو رواں سال اکتوبر میں بھارت کے خلاف ٹی۔20 کرکٹ کپ کے ایک میچ میں پاکستانی کرکٹ ٹیم کی فتح کا جشن منانے پر گرفتار کیا گیا تھا۔ ہائی کورٹ میں اپنی ضمانت کی درخواستوں میں کشمیری طالب علموں نے اپنے خلاف دائر مقدمے کو متھرا شہر منتقل کرنے کی بھی درخواست کی کیونکہ آگرہ کی پوری بار میں سے کوئی بھی وکیل ان کے دفاع میں عدالت میں پیش ہو نے کیلئے تیار نہیں ہے۔
الٰہ آباد
