علاقائی تجارتی تعلقات مضبوط بنانا پائیدار اقتصادی ترقی کیلئے ضروری ہے، ناصر منصور

اسلام آباد(نمائندہ خصوصی)اسلام آباد چیمبر آف کامرس اینڈ انڈسٹری کے صدر ناصر منصور قریشی نے کہا ہے کہ علاقائی تجارتی تعلقات کو مضبوط بنانا ملک کی پائیدار اقتصادی ترقی اور خوشحالی کو یقینی بنانے کے لیے بہت ضروری ہے، آئی سی سی آئی کے صدر نے نشاندہی کی کہ پاکستان کے موجودہ بیرونی اقتصادی فوائد کا بہت زیادہ انحصار سمندر پار پاکستانیوں، خاص طور پر خلیج تعاون کونسل کے ممالک اور امریکہ میں مقیم پاکستانیوں کی ترسیلات زر پر ہے۔ انہوں نے خبردار کیا کہ بگڑتا ہوا جغرافیائی سیاسی ماحول ترسیلات کی آمد اور براہ راست غیر ملکی سرمایہ کاری پر منفی اثر ڈال سکتا ہے۔صدر قریشی نے زور دے کر کہا کہ اس تناظر میں، ٹرمپ انتظامیہ کی جانب سے ملک کے لیے نئے  ٹیرف کو حتمی شکل دینے سے پہلے پاکستان کے لیے امریکہ سے ٹیرف میں کچھ رعایتیں حاصل کرنا اہم ہے، پاکستان کے اقتصادی منتظمین کو چند اہم ترجیحات پر پوری توجہ مرکوز کرنی چاہیے، بشمول بیرونی کھاتے کو مستحکم کرنا اور برآمدات، ترسیلات زر اور غیر ملکی سرمایہ کاری کو بڑھانا، آئی سی سی آئی پاکستان کے اقتصادی مفادات کو فروغ دینے کے لیے فعال اور وسیع کردار ادا کرنے کے لیے پرعزم ہے۔