اسلام آباد (محمد نواز رضا/ وقائع نگار خصوصی) باخبر ذرائع سے معلوم ہوا  ہے وفاقی وزارت داخلہ نے طالبان قیادت سے ’’براہ راست رابطے‘‘ قائم کرنے کا فیصلہ کرلیا ہے۔ اس سلسلے میں وزیراعظم محمد نوازشریف  سے حتمی منظوری کے بعد وفاقی وزیر داخلہ چودھری نثار علی خان اپنے ذرائع کے ذریعے طالبان سے فیصلہ کن مذاکرات کے لئے رابطے کریں گے۔ وفاقی حکومت‘ طالبان کی مذاکراتی کمیٹی کے سیاسی ایجنڈے کے باعث اسے سائیڈ لائن کردیا جائیگا۔ ذرائع کے مطابق طالبان قیادت بھی حکومت سے فیصلہ کن مذاکرات کی حامی اور مذاکرات کی طوالت کے خلاف ہے۔’’مذاکرات برائے مذاکرات‘‘ نہیں چاہئے۔ ذرائع کے مطابق طالبان قیادت کا آئی ایس آئی کے سابق سینئر افسر میجر (ر) عامر سے مسلسل رابطہ قائم ہے حکومتی حلقوں کی جانب سے ان کو مذاکراتی عمل سے الگ نہ ہونے پر زور دیا جا رہا ہے۔آئندہ ہفتہ کے اوائل میں حکومت کی جانب سے طالبان کی کمیٹی کو مذاکراتی عمل سے الگ کرنے کے اعلان کا امکان ہے۔