گیانا: قومی کرکٹ ٹیم میزبان ویسٹ انڈیز کے خلاف چوتھا ٹی ٹوئنٹی میچ آج کھیلے گی جس کے دوران کانٹے کا مقابلہ متوقع ہے۔
تفصیلات کے مطابق پاکستان اور ویسٹ انڈیز کے درمیان گیانا میں کھیلا جانے والا تیسرا ٹی ٹونٹی میچ بارش کے باعث روک دیا گیا، تیسرے ٹی ٹونٹی میچ میں ویسٹ انڈیز نے ٹاس جیت کر پہلے بیٹنگ کا فیصلہ کیاتھا۔
قبل ازیں پاکستان اور ویسٹ انڈیز کے درمیان کھیلے گئے دوسرے ٹی ٹونٹی میچ میں پاکستان نے دلچسپ مقابلے کے بعد ویسٹ انڈیز کو 7 رنز سے شکست دیدی تھی۔دوسرے میچ میں پاکستان کی جانب سے اننگز کا آغاز شرجیل خان اور محمد رضوان نے کیا تھا، دونوں بلے بازوں کی جانب سے ابتدا میں جارحانہ انداز اپنایا اور وکٹ کے چاروں اطراف شارٹس کھیلے۔ طویل عرصے بعد پاکستان کی اوپننگ جوڑی تبدیل کی گئی۔
ہدف کے تعاقب میں ویسٹ انڈیز کی جانب سے اننگز کا آغاز آندرے فلیچر اور لوئس کیا، آل راؤنڈر محمد حفیظ نے پہلے ہی اوور کی دوسری گیند پر فلیچر کو صفر پر پویلین بھیج دیا۔ کرس گیل ایک مرتبہ پھر بڑی اننگز کھیلنے میں ناکام رہے اور 20 گیندوں پر 16 رنز بنا کر حسن علی کی گیند پر اپنی وکٹ گنوا بیٹھے۔