مقبوضہ کشمیر میں ترجمان پاک فوج میجر جنرل آصف غفور کے پوسٹرز آویزاں،پاک فوج کی حمایت میں ریلی
سرینگر میں پاک فوج کی حمایت میں ریلی نکالی گئی، شرکاء نے ڈی جی آئی ایس پی آر آصف غفور کی تصاویر اٹھا کر مظاہرے کیے، ڈی جی آئی ایس پی آر میجر جنرل آصف غفور کی مقبولیت نے مقبوضہ کشمیر میں بھی پنجھے گاڑھ دیئے، ان کے پوسٹرز شاہراہوں اور گلیوں میں مظاہرین نے لہرا دیئے۔
کشمیر میڈیا سروس کے مطابق سرینگر میں پاک فوج کی حمایت میں ریلی، شرکائ نے ڈی جی آئی ایس پی آر کی تصاویر اٹھا کر مظاہرے کیے، 5 اگست سے مقبوضہ وادی کی ناکہ بندی جاری ہے، سکیورٹی حصار کے باوجود ڈی جی آئی ایس پی آر میجر جنرل آصف غفور کے پوسٹرز آویزاں کردیے گئے۔
وادی کی شاہراہوں اور گلیوں میں پاکستانی فوج کے ترجمان میجر جنرل آصف غفور کے پوسٹرز اور ہینڈبلز آویزاں کیے گئے ہیں جبکہ چند مظاہرین نے بینرز اُٹھا کر نعرے لگائے۔
کشمیر میڈیا رپورٹس کے مطابق پوسٹرز میں ڈی جی آئی ایس پی آر کا کشمیریوں کے لیے آخری گولی اور آخری سپاہی تک لڑنے کا بیان تحریر کیا گیا ہے۔
اُدھر پوسٹر میں حریت رہنماؤں کی جانب سے یہ اعلان کیا گیا ہے کہ کشمیری زمین پر جنت اپنے وطن سے بھارت کو نکالنے کے لیے شانہ بشانہ ہوں گے اور جنت غاصب بھارتی فوج کا مسکن نہیں بن سکتی۔
یاد رہے کہ بھارت نے 5 اگست سے مقبوضہ کشمیر کی خصوصی حیثیت ختم کی ہوئی ہے اور پوری وادی میں وادی میں کرفیو نافذ کررکھا ہے ، جس کے باعث وادی میں مکمل لاک ڈاؤن کی صورتحال ہے جہاں میڈیا کے نمائندوں کا داخلہ بھی بند ہے۔
کشمیر کی موجودہ صورتحال کا پس منظر
بھارت نے 5 اگست کو راجیہ سبھا میں کشمیر کی خصوصی حیثیت ختم کرنے کا بل پیش کرنے سے قبل ہی صدارتی حکم نامے کے ذریعے کشمیر کی خصوصی حیثیت ختم کردی اور ساتھ ساتھ مقبوضہ کشمیر کو وفاق کے زیرِ انتظام دو حصوں یعنی (UNION TERRITORIES) میں تقسیم کردیا جس کے تحت پہلا حصہ لداخ جبکہ دوسرا جموں اور کشمیر پر مشتمل ہوگا۔
بھارت نے اب یہ دونوں بل لوک سبھا سے بھی بھاری اکثریت کے ساتھ منظور کرالیے ہیں۔
آرٹیکل 370 کیا ہے؟
بھارتی آئین کا آرٹیکل 370 مقبوضہ کشمیر میں خصوصی اختیارات سے متعلق ہے۔
آرٹیکل 370 ریاست مقبوضہ کشمیر کو اپنا آئین بنانے، اسے برقرار رکھنے، اپنا پرچم رکھنے اور دفاع، خارجہ و مواصلات کے علاوہ تمام معاملات میں آزادی دیتا ہے۔
بھارتی آئین کی جو دفعات و قوانین دیگر ریاستوں پر لاگو ہوتے ہیں وہ اس دفعہ کے تحت ریاست مقبوضہ کشمیر پر نافذ نہیں کیے جا سکتے۔
بھارتی آئین کے آرٹیکل 370 کے تحت کسی بھی دوسری ریاست کا شہری مقبوضہ کشمیر کا شہری نہیں بن سکتا اور نہ ہی وادی میں جگہ خرید سکتا ہے۔
