سائفرمعاملہ:پی ٹی آئی کا تحقیقات سپریم کورٹ سےکروانےکامطالبہ
اسلام آباد: پاکستان تحریک انصاف نے سائفر اور آڈیو لیکس کے معاملے پر ایف آئی کی تحقیقات کے حکومتی فیصلے کو مسترد کرتے ہوئے سپریم کورٹ کا کمیشن بنانے کا مطالبہ کردیا۔سابق وفاقی وزیر فواد چوہدری نے کہا کہ ’عمران خان کی حکومت ایک سازش کے تحت ہٹائی گئی، اس ضمن میں سائفر کی تحقیقات پرحکومتی آمادگی درست سمت میں قدم ہے لیکن انصاف کا تقاضا ہے کہ یہ تحقیقات ایف آئی اے کے بجائے سپریم کورٹ کا بنایا گیا کمیشن کرے تاکہ دودہ کا دودہ اور پانی کا پانی ہو سکے۔ایک اور ٹویٹ میں فواد چوہدری نے حکومتی فیصلے کے نوٹی فکیشن کی کاپی ٹویٹ کرتے ہوئے کہا کہ ’سائفر موصول ہونے کی تاریخ سب بتا رہی ہے، امید ہے کہ آزادانہ تحقیقات شروع ہونے کے بعد مریم نواز اپنے مؤقف سے پیچھے نہیں ہٹیں گی‘۔انہوں نے کہا کہ آڈیو لیکس کی تحقیقات کے لیے بھی جوڈیشل کمیشن ہی چاہیے تاکہ قوم کے سامنے حقیقیت آشکار ہوسکے۔ مشیر اطلاعات برائے پنجاب حکومت عمر سرفراز چیمہ نے کہا کہ تحریک انصاف تو گزشتہ چار ماہ سے سائفر کی جوڈیشل انکوائری کا مطالبہ کر رہی ہے، حکومت جوڈیشل کمشن انکوائری کی بجائے حکومتی ادارے سے تحقیقات کروا کر اپنی مرضی کی رپورٹ حاصل کرنا چاہتی ہے، ایف آئی اے سے تحقیقات کروا کر اس معاملے کو سلجھانے کی بجائے الجھانے کی کوشش ہے۔سابق وفاقی وزیر خارجہ شاہ محمود قریشی نے کہا کہ ’مسلم لیگ ن کی وفاقی کابینہ کی سمیر نے ثابت کردیا کہ دھمکی آمیز امریکی سائفر ایک حقیقت ہے اور یہ 7 مارچ کو موصول ہوا جس کے بعد 8 مارچ کو بیرونی سازش کے تحت تحریک عدم اعتماد پیش کر کے اسے کامیاب کروایا گیا۔