اقتدار ملا تو پاکستان کی تقدید بدلیں گے، غریبوں کے لیے بھوک مٹاؤ پروگرام شروع کریں گے: بلاول بھٹو زرداری
پاکستان پیپلز پارٹی کے چیئرمین بلاول بھٹو زرداری نے کہا ہے کہ اقتدار ملا تو پاکستان کی تقدید بدلیں گے غریبوں کے لیے بھوک مٹاؤ پروگرام شروع کریں گے جہاں غریبوں کو کھانے پینے کی اشیاء کم قیمت پر ملیں گی پاکستان کی تقدیر بدلنے کے لیے عوام میرا بازو بنیں۔ ٹھٹھہ میں جلسے سے خطاب کرتے ہوئے انہوں نے کہاکہ شاندار استقبال پر شکر گزار ہوں مجھے یقین ہے جس طرح آپ نے شہید بھٹو کا ساتھ دیا اسی طرح اسی سوچ سے اس جذبے سے آپ میرا ساتھ بھی دیں گے، پاکستان پیپلز پارٹی آج واحد جماعت ہے جس نے اپنا منشور پیش کیا، آپ ہماری سیاست سے واقف ہیں آپ ہماری پالیسیوں سے واقف ہیں، آپ جانتے ہو پیپلز پارٹی کا منشور ہمیشہ عوام دوست ہوتا ہے، میں آپ کو بتانا چاہتا ہوں کہ بلاول بھٹو زرداری اپنے پہلا انقلابی منشور لا رہا ہے، ہم ہی آپ کے مسائل حل کر سکتے ہیں، پیپلز پارٹی نے ہمیشہ غریب عوام کا خیال رکھا ہے ،ہم نے بے نظیر انکم سپورٹ جیسا انقلابی پروگرام شروع کیا تھا ،ہمارے منشور میں بھوک مٹاؤ پروگرام شامل ہے، اس پروگرام کے ذریعے ہم آپ کو فوڈ کارڈ دیں گے، اس کارڈ کے ذریعے آپ کو کھانے پینے کی اشیاء کم قیمت پر ملیں گی، ہم ہر یونین کونسلز میں فوڈ سٹور کھولیں گے ،فوڈ سٹور عورتیں چلائیں گی تا کہ اس پروگرام کے ذریعے نہ صرف بیروزگاری اور بھوک کا مقابلہ کیا جاسکے بلکہ عورتوں کو بااختیار بنائیں گے، پیپلز پارٹی نے ہمیشہ عوام کی خدمت کی ہے، عوام کے مسائل حل کرنے کے لیے مجھے آپ کے ساتھ کی ضرورت ہے، آپ نے میرا بازو بننا ہے ،ہم ملکر اس ملک کی تقدیر بدل سکتے ہیں اگر آپ میرا ساتھ دیں گے تو ہمیں حکومت بنانے سے کوئی نہیں روک سکتا، ہمیں ملکر بی بی کا وعدہ نبھانا ہے پاکستان بچانا ہے آپ نے تیر پر ٹھپہ لگانا ہے، اگر آپ تیر پر مہر لگا رہے ہو تو بلاول بھٹو زرداری کو ووٹ دے رہے ہو شہید ذوالفقار علی بھٹو اور محترمہ بے نظیر بھٹو کو ووٹ دے رہے ہو۔