ملک بھر میں بجلی کا مسلسل نو گھنٹے کا بریک ڈاﺅن

02 جولائی 2009 (11:09)
لاہور (نیوز رپورٹر/ مانیٹرنگ نیوز) ملک بھر میں بجلی کا مسلسل9 گھنٹے کا بریک ڈاﺅن شروع ہے۔ ملک کے طول وعرض میں آدھے گھنٹے کےلئے بجلی آتی ہے اور 3گھنٹے کےلئے غائب ہو جاتی ہے۔ وسطی پنجاب اورجنوبی پنجاب کے157گاﺅں میں 4 دن سے بجلی بند ہے۔ صارفین پیپکو کےخلاف نعرے بازی اور مظاہروں کا سلسلہ جاری ہے۔ بجلی کے نظام میں خسارہ4700 میگاواٹ تک ہوگیا ہے۔ واپڈا تنصیبات کو نقصان نہ پہنچے پولیس کی اضافی نفری مختلف گرڈ سٹیشن اور دفاتر پر تعینات کر دی گئی ہے۔ دوسری طرف واپڈا اور پیپکو ذرائع کا کہنا ہے کہ منگلا ڈیم میں پاور کیبلز کا مسئلہ حل ہونے تک منگلا ڈیم کا 1100میگاواٹ کا اضافی شارٹ فال بڑھ کر1700 میگواٹ ہوجائےگا۔ واپڈا کے ماہرین کا کہنا ہے کہ لوڈشیڈنگ دورانیے میں کمی نہیں آئےگی۔ مانیٹرنگ نیوز کے مطابق شدید حبس اور گرمی میں لاہور کے مختلف علاقوں میں غیراعلانیہ لوڈشیڈنگ کا دورانیہ 14 سے 16 گھنٹے تک پہنچ جانے کے باعث شہریوں کو شدید مشکلات کا سامنا ہے اور شہری رات کھلے آسمان تلے جاگ کر گزارنے پر مجبور ہیں۔