فیصلہ کن لانگ مارچ کے بعد استعفوں کا فیصلہ ہو گا، رانا ثنا اللہ
مسلم لیگ (ن ) پنجاب کے صدر رانا ثنا اللہ نے کہا ہے کہ فیصلہ کن لانگ مارچ کے بعد استعفوں کا فیصلہ ہو گا،احتجاج، ریلیوں اور مظاہروں سے متعلق پیپلز پارٹی پرعزم ہے۔ انہوں نے میڈیا سے بات کرتے ہوئے کہا کہ سی سی پی او لاہور کی تبدیلی سے پولیس سے متعلق منفی تاثر قائم ہوا ، پولیس افسران ان لوگوں کے ملازم بننے کے بجائے فرض ادا کریں میں سی سی پی او لاہورعمر شیخ سے اظہار ہمدردی کرتا ہوں اور نئے سی سی پی او سے کہتا ہوں قانون اور انصاف کے مطابق کام کریں۔رانا ثنا اللہ نے کہا کہ پی ڈی ایم کی تحریک سے عوامی دبائو میں اضافہ ہوتا رہے گا۔ ہم استعفے دیں گے اوراسمبلیوں کو تحلیل کیا جائے گا جبکہ فیصلہ کن لانگ مارچ کے بعد استعفوں کا فیصلہ ہو گا۔انہوں نے کہا کہ گزشتہ روز پی ڈی ایم اجلاس میں پیپلز پارٹی نے اپنا موقف پیش کیا اور استعفوں پر پیپلز پارٹی نے حالات کے مطابق موقف دیا، جلسوں، احتجاج، ریلیوں اور مظاہروں سے متعلق پیپلز پارٹی پرعزم ہے۔ انہوںنے کہا کہ گھبرایا ہوا شخص کبھی کہتا ہے کہ میں گھبرایا ہوا ہوں ؟ لانگ مارچ کے راولپنڈی یا اسلام آباد میں پڑائو سے متعلق فیصلہ قیادت کرے گی۔انہوں نے کہا کہ وزیر اعظم کے ترجمانوں کی فوج دفاع کے لیے روز بیٹھی ہوتی ہے۔انہوں نے کہا کہ انتقامی کارروائیوں کے سامنے عدلیہ کو دیوار بننا چاہئے، حکومتی انتقام دن بدن بڑھتا جا رہا ہے۔انہوں نے کہا کہ حکومت نے 3ماہ اپوزیشن کے جلسوں پر توجہ دینے کے سوا کچھ نہیں کیا۔
