کولمبو: وزیر خارجہ شاہ محمود قریشی سرکاری دورے پر سری لنکا پہنچ گئے ۔ انہوںنے کہا دونوں ممالک کے پاس ایک دوسرے سے مستفید ہونے کے بہترین مواقع موجود ہیں۔

کولمبو ائیر پورٹ پر میڈیا سے گفتگوکرتے ہوئے وزیر خارجہ مخدوم شاہ محمود قریشی نے کہا کہ میں یہاں وزیر اعظم عمران خان اور صدر پاکستان کی طرف سے نئے قیادت کے نام خصوصی خط لیکر سری لنکا پہنچا ہوں، پاکستان اور سری لنکا کے مابین دیرینہ مضبوط مراسم ہیں، انہوں نے کہا کہ پاکستان اور سری لنکا نے باہمی طور پر ایک دوسرے کی ہمیشہ معاونت کی ہے اور بین الاقوامی سطح پر بھی ایک دوسرے کو سپورٹ کیا ہے۔

 بچوں کو ماں کا دودھ پلانے کی مہم کو موثر بنانے کی ضرورت ، ڈاکٹر فیصل سلطان

شاہ محمود قریشی نے کہا کہ سری لنکا کے نو منتخب صدر اور نئے وزیر اعظم مقرر کئے گئے۔ دونوں شخصیات کے ساتھ ہماری گہری شناسائی ہے اور دونوں پاکستان کے دوست ہیں ۔ موجودہ وزیر اعظم سری لنکا گذشتہ دو ادوار میں سری لنکا کے صدر رہ چکے ہیں۔ ان کے ادوار میں پاکستان اور سری لنکا کے مابین دو طرفہ تعلقات بہت مستحکم ہوئے، وزیر خارجہ کا کہنا تھا کہ دونوں ممالک کے پاس ایک دوسرے سے مستفید ہونے کے بہترین مواقع موجود ہیں، میں انشاءاللہ کل سری لنکا کے صدر، وزیر اعظم اور وزیر خارجہ سے ملاقات کروں گا۔

دفتر خارجہ کے مطابق وزیر خارجہ مخدوم شاہ محمود قریشی دو روزہ سرکاری دورے پر سری لنکا پہنچ گئے، بندرا نائیکے انٹرنیشنل ائیر پورٹ کولمبو پہنچنے پر وزارت خارجہ سری لنکا کے ایڈیشنل سیکریٹری ایمبیسڈر پی سلوراج اور پاکستانی ہائی کمیشن کے اعلیٰ حکام نے ان کا پرتپاک خیرمقدم کیا۔ وزیر خارجہ کل سری لنکا کی اعلیٰ قیادت سے ملاقاتیں کریں گے، وہ سری لنکا کے نومنتخب صدر، وزیر اعظم اور وزیر خارجہ سے الگ الگ ملاقاتیں کریں گے اور منصب سنبھالنے پر مبارک باد پیش کریں گے۔ 

پاکستان اور چین کا سی پیک کے تحت زرعی تعاون میں کئی گنا اضافہ کا اعادہ