آرمی چیف سے ایلس جے ویلز کی ملاقات: پاکستان، امریکہ کا الزام تراشیوں کی بجائے امن کیلئے مثبت تعاون جاری رکھنے کا عزم
پاکستان اور امریکا نے الزام تراشیوں کے بجائے خطے میں امن و استحکام کیلئے مثبت تعاون جاری رکھنے پر اتفاق کر لیا ہے پاک فوج کے شعبہ تعلقات عامہ(آئی ایس پی آر) کے مطابق امریکی قائم مقام نائب وزیرِ خارجہ ایلس جے ویلز نے آرمی چیف جنرل قمر جاوید باجوہ سے جنرل ہیڈ کوارٹرز میں ملاقات کی۔جس میں باہمی دلچسپی اور علاقائی سلامتی سے متعلق امور پر تبادلہ خیال کیا گیا۔آئی ایس پی آر کے مطابق امریکی قائم مقام نائب وزیر خارجہ ایلس ویلز سے بات چیت کرتے ہوئے آرمی چیف جنرل قمر جاوید باجوہ نے کہا کہ پاکستان قومی سوچ کےساتھ خطے بالخصوص افغانستان میں امن و استحکام کیلئے پرعزم ہے۔ خطے کے دیگر ممالک سے بھی توقع رکھتے ہیں کہ وہ بھی اس عمل میں مساوی اور مثبت کردار ادا کریں گے۔آئی ایس پی آر کے مطابق قائم مقام امریکی نائب وزیرِ خارجہ ایلس ویلز نے کہا کہ امریکا نے خطے میں پائیدار امن کا عزم کر رکھا ہے اور دیرپا امن کیلئے کی جانےوالی تمام کوششوں کی حمایت کرتا ہے۔ آئی ایس پی آر کے مطابق ملاقات میں دونوں ملکوں نے اتفاق کیا کہ الزا تراشیوں کے بجائے خطے میں امن کیلئے مثبت تعاون جاری رکھا جائےگا۔