پاک چین دوستی باعث فخر ،دنیا بھر کیلئے مثال بن گئی، چوہدری شجاعت
اسلام آباد(وقائع نگار خصوصی) پاکستان مسلم لیگ)ق) کے صدر و سابق وزیراعظم چودھری شجاعت حسین اور سینئرمرکزی رہنما و سابق نائب وزیراعظم چودھری پرویزالٰہی نے چینی سفیر مسٹر جنگ یائو کے اعزاز میں ظہرانہ دیا۔ چودھری شجاعت حسین نے اس موقع پر کہا کہ پاک چین دوستی باعث فخر ہے، چین نے پاکستانی عوام کی ترقی و خوشحالی کیلئے گرانقدر خدمات انجام دیں ہم چین کے ممنون ہیں، ہر مشکل وقت میں چین نے پاکستانی عوام کا ساتھ دیا اور پاک چین دوستی دنیا بھر کیلئے مثال بن گئی ہے۔ چینی سفیر کا کہنا تھا کہ چین کو پاکستانی عوام کا مفاد بہت عزیز ہے، پاک چین اقتصادی راہداری کے ثمرات سے دونوں ملکوں کے عوام استفادہ حاصل کریں گے جبکہ پاکستان اور چین کے سٹریٹجک تعلقات خطے کے لوگوں کے مفاد میں ہیں۔ ظہرانہ میں مختلف ممالک کے سفارتکاروں نے بھی شرکت کی جن میں ہالینڈ، ترکی، بھارت، سپین، بحرین، ایران، انڈونیشیا، آذربائیجان، قازقستان، لیٹویا، پولینڈ، جمہوریہ چیک، نیپال بھی شامل ہیں۔ پاکستان مسلم لیگ کے مرکزی سیکرٹری جنرل طارق بشیر چیمہ، کامل علی آغا، محمد بشارت راجہ، ریٹائرڈ جنرل احسان الحق، شاہد اقبال، اعجاز اعوان، ڈاکٹر خالد رانجھا، گوہر ایوب خان، اجمل خان وزیر، وجیہہ الزمان کے علاوہ دیگر مسلم لیگی رہنما شریک تھے۔
ظہرانہ