چوکوں‘چوراہوں پر ڈرائیونگ لائسنس بنانے کی سہولت متعارف

لاہور(نامہ نگار) ٹریفک پولیس نے لاہور میں شہریوں کی سہولت کیلئے چوکوں اور چوراہوں پر ڈرائیونگ لائسنس بنانے کی سہولت متعارف کرادی ہے۔چیف ٹریفک آفیسر لاہور ڈاکٹر اطہر وحید کے مطابق لاہور ٹریفک پولیس نے جدید ممالک کے طرز پر ٹریفک کیاسک کا آغاز کر دیا ہے۔ ابتدائی طور پر افشاں چوک مال روڈ پر جدید ٹیکنالوجی سے مزین کیبن نصب کیا گیا ہے، جہاں لائسنس کے بغیر موٹر سائیکل چلانے والوں کے ڈرائیونگ کے لائسنس بنائے جائیں گے۔ڈاکٹر اطہر وحید کا کہنا تھا کہ ٹریفک کے متعلقہ تمام سہولیات ان کے ذریعے فراہم کی جائیں گی جبکہ چوک چوراہوں پر براہ راست لائسنس بنانے کی سہولت بھی مہیا کی جا رہی ہے۔ اس حوالے سے ٹریفک کنٹرول کیلئے کیاسک میں لاوڈ سپیکر سسٹم بھی نصب کیا گیا ہے جہاں ٹریفک وارڈنز یہاں 24 گھنٹے ڈیوٹی انجام دیں گے اور ان کیلئے ٹھنڈے پانی، اے سی، آرام کرنے کی جگہ اور شدید موسم سے بچاؤ کی سہولیات بھی فراہم کی گئی ہیں۔ افشاں چوک کے بعد مال روڈ، گلبرگ، اقبال ٹاؤن سمیت دیگر علاقوں میں بھی مرحلہ وار ٹریفک کیاسک متعارف کروائے جائیں گے۔ یہ منصوبہ وزیر اعلیٰ پنجاب کی ہدایت پر عمل میں لایا جا رہا ہے۔