پاک بحریہ کمایڈ اینڈ سٹاف کانفرنس ختم ، ، جار حیت کیخلاف موثر جواب کیلئے تیاریوں پر زور : جنرل ساھر شمشاد کا نیول ہنڈ کواٹر زدورہ 

اسلام آباد (خبرنگارخصوصی) پاک  بحریہ کی کمانڈ اینڈ سٹاف کانفرنس نیول ہیڈکورٹر اسلام آباد میں ختم  ہو گئی۔ کانفرنس کی صدارت چیف آف دی نیول سٹاف ایڈمرل نوید اشرف نے کی۔ ترجمان پاک بحریہ کے مطابق فورم میں بحیرہ ہند کی سکیورٹی صورتحال کا جائزہ لیا گیا اور خطے سے گزرنے والی قومی سمندری تجارت کے تحفظ اور سلامتی کے اقدامات پر غور کیا گیا۔ کانفرنس کے دوران نئے سال کے آغاز میں پاک بحریہ کی کثیر الجہتی مشق امن اور پہلے امن ڈائیلاگ کی تیاریوں، جیو سٹرٹیجک ماحول، قومی سلامتی، پاک بحریہ کی آپریشنل تیاریوں، تربیت اور اہلکاروں کی فلاح و بہبود سے متعلق امور کا تفصیل سے جائزہ لیا گیا۔ چیف آف دی نیول سٹاف کو پاک بحریہ کے جاری اور مستقبل کے اہم ترقیاتی منصوبوں کے بارے میں بھی جامع بریفنگ دی گئی۔ نیول چیف نے میری ٹائم سکیورٹی کو مضبوط بنانے اور  جنگی تیاریوں کو برقرار رکھنے پر زور دیا تاکہ پاکستان کے خلاف کسی بھی جارحیت کا مؤثر طریقے سے جواب دیا جا سکے۔  نیول چیف نے ملکی بحری سرحدوں کی حفاظت میں درپیش میری ٹائم چیلنجز سے نمٹنے کے لیے پاک بحریہ کی اعلی آپریشنل تیاریوں پر بھی مکمل اعتماد کا اظہار کیا اور اہلکاروں کے حوصلے اور جذبے کی تعریف کی۔ کمانڈ اینڈ سٹاف کانفرنس پاک بحریہ کا اعلیٰ فیصلہ ساز فورم ہے جس میں چیف آف دی نیول سٹاف کی سربراہی میں پرنسپل سٹاف آفیسرز اور فیلڈ کمانڈرز پاک بحریہ کی پالیسیوں اور منصوبوں کا جائزہ لیتے ہیں۔ دریں اثناء چیئرمین جوائنٹ چیف آف سٹاف کمیٹی جنرل ساحر شمشاد مرزا نے نیول ہیڈ کوارٹرز اسلام آباد کا دورہ کیا اور چیف آف دی نیول سٹاف ایڈمرل نوید اشرف سے ملاقات کی۔ ملاقات میں باہمی دلچسپی کے امور، عصری جغرافیائی سیاسی صورتحال اور ابھرتے ہوئے میری ٹائم سکیورٹی چیلنجز پر تبادلہ خیال کیا گیا۔ جنرل ساحر شمشاد مرزا نے خطے میں میری ٹائم سکیورٹی کو یقینی بنانے میں پاک بحریہ کے کردار کو سراہا۔