کراچی(نیوزرپورٹر) جماعت اسلامی سندھ کے امیر وسابق رکن قومی اسمبلی محمد حسین محنتی نے کشمیر میں حقوق انسانی کی سنگین خلاف ورزیوں پر تشویش اور بھارتی مظالم کی مذمت کرتے ہوئے کہا ہے کہ بھارت طاقت کی بنیاد پر اب زیادہ دیر تک کشمیریوں کو اپنا غلام نہیں بناسکتا، شہداء کی قربانیوں اور کشمیری عوام کی جدوجہد کے نتیجے میں وادیء کشمیر میں جلد آزادی کا سورج طلوع ہوگا، جماعت اسلامی کے تحت 5فروری کو کراچی تا کشمور سندھ میں یوم یکجہتی کشمیر بھرپور طریقے سے منایا جائے گا، امیر جماعت اسلامی سینیٹر سراج الحق پانچ فروری کو کراچی میں کشمیر مارچ کی قیادت کریں گے، ان خیالات کا اظہار انہوں نے قباء آڈیٹوریم میں جماعت اسلامی سندھ کی مشاورتی اجلاس سے خطاب کرتے ہوئے کیا، اس موقع پر قیم کاشف سعید شیخ ودیگر ذمہ داران بھی موجود تھے۔ محمد حسین محنتی نے مزید کہا کہ کشمیری عوام خاص طور پر یونیورسٹیوں میں اعلیٰ تعلیم یافتہ نوجوان ،اساتذہ اور شہید مظفر برہان وانی نے جدوجہد آزادی کی تحریک میں نئی روح پھونک دی ہے، ان شاء اللہ شہداء کی قربانیاں اور کشمیری عوام کی جدوجہد ضڑور ایک دن رنگ لائے گی، صوبائی امیر نے زور دیا کہ پانچ فروری کو باب الاسلام سندھ میں ہر چھوٹے بڑے مقام پر ریلیاں ومظاہروں کا اہتمام کرکے بھارتی مظالم کی مذمت اور اپنے کشمیری بھائیوں سے اظہار یکجہتی کیا جائے۔ دریں اثناء مرکزی نائب امیر اسداللہ بھٹو سکھر، صوبائی امیر محمد حسین محنتی کراچی، ڈاکٹر معراج الہدیٰ صدیقی حیدرآباد،کاشف سعید شیخ لاڑکانہ،نظام الدین میمن شکارپور، حافظ نصراللہ عزیز جیکب آباد،عظیم بلوچ مٹیاری میں کشمیر ریلیوں سے خطاب کریں گے۔