وزارت منصوبہ بندی میں سی پیک سے متعلق اہم اجلاس, اجلاس میں وزیر منصوبہ بندی اسد عمر اور معاون خصوصی سی پیک امور خالد منصور کی شرکت. اعلامیہ میں کہا گیا کہ اجلاس میں چائنا چیمبر آف کامرس فار ایکسپورٹ اینڈ امپورٹ کے وفدنے بھی شرکت کی، تقریب میں وزیر منصوبہ بندی نے چینی سرمایہ کاروں کو ٹیکسٹائل کے شعبے میں بہتری سے متعلق آگاہ کیا۔اسد عمر نے کیا کہ ٹیکسٹائل سمیت دیگر شعبوں میں چینی سرمایہ کاروں کا اعتماد چاہتے ہیں، پاکستان میں ٹیکسٹائل کے شعبے میں سرمایہ کاری کے مواقع موجود ہیں۔ خالد منصور نے کہا کہ سرمایہ کاری کیلئے سرمایہ کاروں کو سہولیات فراہم کرنے کیلئے اقدامات کئے جارہے ہیں، سرمایہ کاری کیلئے قانونی فریم ورک کو مزید بہتر بنایا جا رہا ہے، فریم ورک کے بعد سرمایہ کاروں کو اپنے کام شروع کرنے اور چلانے میں آسانی ہوگی۔ اعلامیہ میں یہ بھی کہا گیا کہ چینی سرمایہ کاروں کو پاکستان کے ٹیکسٹائل سیکٹر کے بارے میں تفصیلی بریفنگ دی گئی، بریفنگ میں پاکستان کے تقابلی فوائد کے مختلف پہلوؤں کی تفصیلات سے آگاہ کیا گیا۔ نمائندہ چائنا چیمبرنے کہا کہ سفری پابندیاں ختم ہوتے ہی سرمایہ کاروں کے دوروں کا اہتمام کیا جائے گا۔
