مقبوضہ کشمیر میں آرٹیکل 370اے: یہ اقدام کشمیریوں کو سوچنے پر مجبور کردے گا کہ بھارت کے ساتھ تعلق رکھنا ہے یا نہیں: محبوبہ مفتی
سری نگر: مقبوضہ کشمیر کی سابق وزیراعلیٰ محبوبہ مفتی نے مقبوضہ وادی میں آرٹیکل 370 اے کے معاملے پر مودی سرکار کو خبردار کردیا۔
تفصیلات کے مطابق بھارتی وزیرخزانہ ارون جیٹلے نے مقبوضہ کشمیر میں آرٹیکل تیس سو ستر اے کو ختم کرنے کی تجویز دی تھی جس پر محبوبہ مفتی نے مودی سرکار کو وارننگ دے دی۔مقبوضہ کشمیر کی سابق وزیراعلیٰ کا کہنا تھا یہ اقدام کشمیریوں کو سوچنے پر مجبور کردے گا کہ بھارت کے ساتھ تعلق رکھنا ہے یا نہیں۔محبوبہ مفتی کا مزید کہنا تھا کہ اس سے بھارت اور مقبوضہ کشمیر کے درمیان تعلق ختم ہو جائے گا۔
خیال رہے کہ مقبوضہ وادی میں بھارتی جارحیت کا سلسلہ تاحال جاری ہے۔ آئے دن بھارتی افواج نہتے کشمیریوں کو شہید کردیتے ہیں۔اُدھر بھارت کی مختلف یونیورسٹیوں میں زیر تعلیم کشمیری نوجوانوں پر تشدد کے واقعات میں اضافہ ہورہا ہے جبکہ مودی حکومت نے سوشل میڈیا پر بھی کریک ڈاؤن کا آغاز کردیا ۔جس کے تحت کشمیری نوجوانوں اور مسلمان پروفیسر کے خلاف ایکشن لیا گیا۔محبوبہ مفتی نے پلوامہ حملے کے بعد پیدا ہونے والی صورتحال اور بھارت کی جنگی دھمکیوں پر مودی حکومت پر تنقید کرتے ہوئے کہا تھا کہ ’پاکستان جوہری ملک ہے اس لیے بات چیت سے ہی مسائل کا حل نکالنا چاہیے، جنگ کا سوچنے والے پاگل اور جذباتی ہیں‘۔