ویمن یونیورسٹی حقوق نسواں کو نصاب کا حصہ بنائے گی:ڈاکٹر عظمٰی قریشی
لاہور (لیڈی رپورٹر)لاہورکالج فار ویمن یونیورسٹی حقوق نسواں کو نصاب کا حصہ بنائے گی، یونیورسٹی اورپنجاب کمشن آن سٹیٹس آف ویمن نے خواتین کے حقوق کوا جاگر کرنے،صنفی قوانین سے آگاہی اور نصاب میں ان موضوعات کی شمولیت کیلئے مشترکہ مہم شروع کرنے پر اتفاق کیا ہے۔کمشن اس سلسلے میں لاہورکالج فار ویمن یونیورسٹی کی تحقیق سے استفادہ کرے گا۔دونوں اداروںنے اس حوالے سے مفاہمتی یادداشت پر دستخط کردئیے۔ وائس چانسلر ویمن یونیورسٹی پروفیسرڈاکٹر عظمیٰ قریشی اور پنجاب کمشن آن سٹیٹس آف ویمن کی سربراہ فوزیہ وقار نے معاہدے پر دستخط کئے۔ڈاکٹر عظمیٰ قریشی نے بتایاکہ حقوق نسواں معاشرے کا اہم باب ہے خواتین کی شرح خواندگی،ان کی ملازمت، فی کس آمدنی اوردیگر امور کے بارے میں صحیح اعداد و شمار دستیاب ہوںگے تو بہترپالیسی سازی ممکن ہوگی۔ فوزیہ وقار نے کہا کہ حقوق نسواں اور تحفظ نسواں سے متعلق آگاہی کیلئے دونوں ادارے ہر سال کم ازکم چھ سیمینارز منعقد کریںگے۔