قومی کرکٹ ٹیم ویسٹ انڈیز روانہ ورلڈ کپ میں براہ راست شمولیت ڈے سیریز میں کامیابی سے مشروط
لاہور (سپورٹس رپورٹر)سرفراز احمد کی زیر قیادت قومی کرکٹ ٹیم کراچی سے براستہ دبئی ویسٹ انڈیز کیلئے روانہ ہوگئی۔ قومی کر کٹ ٹیم کیریبیئن ٹور میں چار ٹی ٹونٹی اور تین ون ڈے انٹرنیشنل میچز کھیلے گی۔ پاکستان کی 15 رکنی ٹی ٹونٹی ٹیم کے ہیڈ کوچ مکی آرتھر جبکہ طلعت علی منیجر ہوں گے۔ دورے کا آغاز 4 ٹی ٹونٹی میچوں کی سیریز سے ہوگا جس کا پہلا میچ 26 مارچ کو کنگسٹن جمیکا میں کھیلا جائے گا۔ بقیہ 3 میچز 30 مارچ، یکم اور 2 اپریل کو گیانا میں شیڈول ہیں۔ ٹی ٹونٹی سیریز کے بعد 3 ون ڈے میچز میں ٹیم کی قیادت بھی سرفراز احمد ہی کریں گے۔ ٹی ٹونٹی سکواڈ میں شامل 4 کھلاڑی سہیل تنویر، محمد نواز،رومان رئیس اور عثمان شنواری وطن واپس آجائیں گے اور ایک روزہ میچوں کے لئے منتخب 5 کھلاڑی آصف ذاکر، محمد عامر، فہیم اشرف، محمد اصغر اور جنید خان ٹیم کو جوائن کریں گے۔ ورلڈکپ 2019 میں براہ راست شرکت کے لئے پاکستان کا ون ڈے سیریز جیتنا بہت اہم ہے۔ قومی ٹیم ون ڈے سیریز جیت کر ورلڈ کپ کے لئے براہ راست کوالیفائی کرلے گی۔ مصباح الحق کی کپتانی میں 3 ٹیسٹ میچز کے لئے ٹیم کا اعلان بعد میں کیا جائے گا۔