ہیمپشائر نے شاہد آفریدی کی خدمات دوبارہ حاصل کر لی

لاہور(اسپورٹس رپورٹر)انگلش کاؤنٹی ہیمپشائر نے رواں سال ٹی20 بلاسٹ ٹورنامنٹ کیلئے عالمی شہرت یافتہ سابق پاکستانی آل راؤنڈر شاہد آفریدی کی خدمات دوبارہ حاصل کر لی ہیں۔شاہد آفریدی نے گزشتہ سیزن میں ہیمپشائر کاؤنٹی کی نمائندگی کرتے ہوئے 11 میچوں میں نو وکٹیں حاصل کرنے کے ساتھ ساتھ 191 رنز بھی بنائے تھے۔یہ 2011 کے بعد تیسرا موقع ہو گا کہ شاہد آفریدی انگلش ٹی20 ٹورنامنٹ میں جلوہ گر ہوں گے۔ڈائریکٹر آف کرکٹ جائلز وائٹ نے کہا کہ ٹی20 کیلئے آفریدی ایک بہترین انتخاب ہیں اور وہ ہماری ٹیم کو مزید مضبوط بنا دیں گے۔2011 میں سمر سیٹ کے خلاف سیمی فائنل میچ میں شاہد آفریدی نے 42 گیندوں پر 80 رنز کی اننگز کھیلی تھی جہاں ٹائی ہونے والے میچ کے سپر اوور میں ہیمپشائر کو ڈک ورتھ لوئس قانون کے تحت شکست ہوئی تھی۔آفریدی نے رواں سال ہر طرز کی انٹرنیشنل کرکٹ سے ریٹائرمنٹ کا اعلان کرتے ہوئے دنیا بھر میں ٹی20 لیگز کھیلنے کا سلسلہ جاری رکھنے اور اپنے فلاحی فاؤنڈیشن پر توجہ دینے کا اعلان کیا۔